مدرسة جرافيك مان  

مشاريع افترافكت


خلفيات الاستوديوهات الدعايه والاعلان و الطباعة دورة فوتوشوب الاستوديوهات دورة سويش ماكس دورة مونتاج الفيديو تحميل خلفيات فيديو خلفيات فوتوشوب psd جرافيك مان
الانتقال للخلف   مدرسة جرافيك مان > منتدى طلاب مدرسة جرافيك مان > قسم المواضيع القديمه

الملاحظات

قسم المواضيع القديمه مواضيع انتهت صلاحية الروابط او الصور ويتم الاحتفاظ بها كأرشيف


كيف تصبح مصمم محترف فى مجال الإعلان والدعاية (نصائح مهمة جداً)

مواضيع انتهت صلاحية الروابط او الصور ويتم الاحتفاظ بها كأرشيف


موضوع مغلق
 
أدوات الموضوع إبحث في الموضوع انواع عرض الموضوع
قديم 31-07-2012, 12:34 AM   #1
حسين توشكا
مخالف للقوانين
افتراضي كيف تصبح مصمم محترف فى مجال الإعلان والدعاية (نصائح مهمة جداً)

السلام عليكم ورحمة الله وبركاته
كنت بتصفح فى الانترنت وبصراحة لقيت هالموضوع لما قرأته كله دون ان اترك حرف واحد حسيت براحة كثيرة ..لانه احنا عيبنا دايما نروح نطلع السلم مرة وحدة ودايما بنشرد من حاجة اسمها أساسيات .. طب اسمع اقولك اقرا هذه النصائح وقولها بعدها شعورك ايه ؟؟
معلومات ونصائح غاية في الاهمية عن التصاميم الدعائية
كيف تصبح مصمم محترف فى مجال الإعلان والدعاية (نصائح مهمة جداً)
بسم الله نبدأ
مما يلاحظ هذه الايام أن البعض يتخبطون في أمر صعب للغاية ألا وهو التصميم الإعلاني
المبدع!! يظن هؤلاء البعض أن مجرد معالجة صورة معينة عن طريق إضافة بعض المؤثرات
الجاهزة عليها مع وضع بعض النصوص هنا وهناك، يمكن أن يعطينا تصميماً ناجحاً، وهم أبعد
ما يكون عن موضوع الإبداع!!
.
.
عملية التصميم، ليست بالأمر السهل أبداً، لأنها عملية مزاجية من ناحية، وعملية مرتبطة
بمفاهيم فلسفية وآثار نفسية صريحة من ناحية، وعملية مرتبطة بقواعد فنية من ناحية أخرى.
دعنا نفهم هذا الكلام: تصور أنك تصمم منشور دعائي (لمجلة ما) عن مشروب مرطب مثل
البيبسي كولا!! جرب ثم جرب ثم جرب، حتى تصاب بإحباط كبير!! يا إلهي، هل يعقل هذا؟؟ أنا
عاجز تماماً عن فعل شيء. وفجأة تقدح في ذهنك فكرة مبدعة وخلاقة عن تصميم رائع، وتبدأ
العمل بحماس كي تـنجز التصميم، وبعد جهد كبير تـنجح بإنجاز تصميم رائع بكل معنى الكلمة،
وتسرع لتقديم التصميم، للجهة المستفيدة منه، وهنا تتعرض للصدمة، تصميمك مرفوض
تماماً!!! يا الله، أبعد كل هذا الجهد؟؟؟ ثم يأتي مصمم آخر، لم يفعل شيء يذكر مقارنة بما فعلته
أنت، ومع هذا ترى الجهة المستفيدة تطير فرحاً بما فعله!! فما الذي حصل؟؟
فيما يلي مجموعة من النصائح عن موضوع التصميم الإعلاني المبدع، فاسمع وافهم ما سأقوله
لك الآن:
.
.
1
صاحب القرار لدى الجهة المستفيدة، لم يرق له تصميمك. إنه المزاج. واحدة من المصائب
التي غالباً ما تواجه المصمم، هو تعامله مع أشخاص لا يفقهون شيئاً عن عالم الدعاية
والإعلان. ولكنهم أصحاب القرار النهائي. عليك أن تعيش مع هذا أو اضرب رأسك بالحائط.
.
.
2
لا لا لا، صاحب القرار شخص مبدع وذو خبرة في مجال الدعاية والإعلان، ولكن افهم، نحن
نتحدث عن مشروب البيبسي كولا، وكل الناس تعرف هذا المشروب وذاقوا طعمه، فما هذا
التصميم الذي جئتـنا به؟؟ نحن نريد تصميم يذكر الناس بالعطش، وليس تصميم نقول فيه أن
هناك شيء اسمه البيبسي كولا!! هل فهمت الآن؟؟ إنه الأثر النفسي للصورة. المطلوب هو حث
الناس على شراء هذا المنتج، عن طريق تذكيرهم بنقيضه وهو العطش (وهذا مجرد مثال بسيط
.
احمد عباس
كيف تصبح مصمم محترف فى مجال الإعلان والدعاية (نصائح مهمة جداً)
3
التأثير النفسي للصورة أمر غريب ويصعب إخضاعه لقواعد محددة، ولكن دعونا نتحدث
ونتجاذب الحديث قليلاً عن هذا الأمر. فكر معي جيداً، ماذا يجب أن نفعل إذا كنا نريد أن نصمم
دعاية عن عطر رجالي معين. ألا تعتقد أن الأشياء تبدو أوضح مع نقائضها؟؟ صورة خلفية هي
عبارة عن كتلة هائلة من القمامة، وأمام هذه الكتلة رجل بملابس عادية نظيفة (دون إظهار
ملامح هذا الرجل بشكل صارخ)، وتبدو في واجهة الصورة كلها سيدة باهرة الجمال مغمضة
العينين، وتنظر نحو الأعلى قليلاً، وتبتسم ابتسامة خفيفة (ملامح السيدة هذه يجب أن تكون
واضحة بشكل صارخ)، وفي أسفل الإعلان ذكر لاسم العطر، بدون إظهار صورة قارورة العطر.
فكر أنك ترى مثل هذا التصميم في مجلة أو كإعلان كبير في أحد الطرق: إن كان هذا التركيب
الغريب يجعلك تضحك من قلبك، فقد نجح التصميم، وكان الأمر مبدعاً. مجرد حث الناظر على
الضحك (ومن ثم التفكير قسراً، يعني غصباً عنه) يجعل من التصميم ناجحاً. دعني أذكر لكم
تجربة شخصية مررت بها، كان المطلوب حملة إعلانية عن عصير فاكهة منعش. على شكل
نشرات في الطرقات ضمن لوحات إعلانية (تسمى هذه اللوحات موبيـز). كانت فكرتي هي تقسيم
الحملة إلى فترتين، في الفترة الأولى يتم نشر تصميم هو عبارة عن صورة طفل رضيع مستلق
على ظهره، وهو يبكي، وهناك يد تمتد نحوه برضاعة مملوءة بالحليب، فقط، لا كلمات ولا أي
شيء آخر، تمتد هذه الفترة نحو عشرة أيام، في الفترة الثانية، يتم نشر تصميم آخر، لنفس
الطفل مستلق على ظهره، ولكنه هذه المرة يبتسم بسعادة، وهناك يد تمتد نحوه بعلبة العصير،
والطفل ينظر ناحية العلبة ويده تمتد لمحاولة التقاطها، فقط، لا كلمات ولا أي شيء آخر. الآن
سأترك تقدير نجاح هذا التأثير على الناظر لكم أنتم. ويطول ويطول ذكر الأمثلة.
.
.
4
أقول لكم، أن هناك شئ اسمه الحث البصري، وشئ اسمه الحث الذهني. وشئ اسمه الفراغ،
وشئ اسمه المبالغة، وهذه عناصر مهمة للغاية في توليد التأثير النفسي الفعال للتصميم
الإعلاني الناجح.
.
احمد وحيد Nile FM.
كيف تصبح مصمم محترف فى مجال الإعلان والدعاية (نصائح مهمة جداً)
5
من أوجه الحث البصري استخدام التباين اللوني الصارخ (أبيض مع أسود، أزرق قاني مع
أصفر صارخ، أبيض مع أحمر قاني، …الخ) هذا الأمر تشتد أهميته مع التصميم الذي يتكون
فقط من نص. ومن أوجه الحث البصري أيضاً، هو استخدام اللون مع الصورة غير الملونة.
مثلاً: دعاية عن عدسات لاصقة ملونة، أقول وبكل بساطة: صورة غير ملونة لشخص (رجل أو
امرأة لا يهم)، ولكن العينين ملونتين (يفضل أزرق أو أخضر)، هو التصميم الناجح في هذه
الحالة.
.
.
6
من أوجه الحث الذهني هو المثال الذي ذكرناه سابقاً عن تصميم دعاية لعطر رجالي، أي
استخدام عنصر النقيض. ومن أوجه الحث الذهني، هو استخدام عبارات تجبر الناظر على
التفكير، مثلاً كان هناك تصميم لحملة تثقيفية عن أهمية الاقتصاد في استهلاك الماء الصافي،
الخطأ الجسيم في ذلك الإعلان هو وضع صورة تتضمن قطرة ماء!! صورة الماء أو قطرة الماء
لا تنفع في هذه الحالة، والتصميم يعتبر فاشلاً لأنه لا يحث الناظر على التفكير في هذا الأمر
الخطير. إن عبارة من مثل ((كم بقي من الوقت حتى ينفذ الماء الصافي في بلدنا؟؟)) مكتوبة
بالأحمر على خلفية بيضاء وفوق هذه العبارة صورة جمجمة مع عظمتين. أو صورة مجموعة
من الأشجار الميتة على أرض شديدة الجفاف، مع عبارة من مثل ((النهاية بعد أن ينفذ الماء
الصافي))، هي تصاميم لها أثر شديد يجبر الناظر على التفكير بهذا الأمر. مثال آخر: حملة
تثقيفية تحث الناس على تجنب السرعة المفرطة في قيادة السيارات. أن تصميم يتضمن صورة
سيارة محطمة تماماً نتيجة حادث مروري مروع، لن تحث الناظر على التفكير أبداً بمخاطر
السرعة المفرطة في قيادة سيارته. ولكن تصميم يتضمن صورة سيارة رائعة وقوية جداً منطلقة
بسرعة جنونية، مع عبارة أسفلها من مثل ((ترى ماذا سيحصل لو انفجر الإطار الأمامي لهذه
السيارة؟؟)) تجعل السائق الذي يقود سيارته وينظر لهذا الإعلان يفكر بالأمر قسراً (يعني غصباً
عنه).
.
.طارق سمير
كيف تصبح مصمم محترف فى مجال الإعلان والدعاية (نصائح مهمة جداً)
.
7
أما الفراغ فهو أمر مهم للغاية في جذب انتباه الناظر وتحقيق عنصر الأناقة في التصميم.
ولكي لا يطول الحديث جرب أن تنظر لكثير من التصاميم في كثير من الإعلانات في المجلات
الأجنبية، وستدرك أهمية وجود الفراغ في التصميم. لاحظت في المنتدى، أن الكثيرين يهتمون
بشدة بمسألة تراكب الصور فوق بعضها، مع أن هذا الأمر منفر للغاية وضد عنصر الأناقة في
التصميم.
.
.
8
المبالغة أيضاً تلعب دوراً مهماً في توليد الأثر النفسي. وهي قد تكون نتيجة وجود صورة
معينة أو عبارة ما في التصميم. فتصميم عن منتج وقود سيارات يستخدم عبارة من مثل (إنه
أكثر بكثير من مجرد وقود)، قد يجعل الناظر يغضب، فماذا يكون إذن؟؟ عصير فواكه يعني؟؟
لاحظ هنا مرة أخرى الناظر يتفاعل مع الإعلان، ولهذا كان التصميم ناجحاً. إنها المبالغة.
.
Andrea Stillacci.
كيف تصبح مصمم محترف فى مجال الإعلان والدعاية (نصائح مهمة جداً)
9
أحد أهم عناصر التصميم المبدع هو التعامل مع النصوص بشكل صحيح، هناك شيء اسمه
الخطوط المقروءة، الخطوط المقروءة هي الخطوط التي يسهل على عين الناظر قراءتها، بمجرد
أن تخطف أمام عينيه، دون الحاجة للتركيز على أشكال الحروف. ولهذا أقول إن استخدام خطوط
غير قياسية أو ذات تراكيب فنية ومنحنيات معقدة، يعتبر خطأً كبيراً في التصميم الإعلاني
المبدع، هذا من ناحية، من ناحية ثانية، نلاحظ أن البعض يلجأ لاستخدام أكثر من نوعي خط في
تصميم واحد، وهذا خطأ آخر. جرب أن تدرس تصاميم الإعلانات في المجالات الأجنبية بعناية،
ستلاحظ أن كل الإعلان يتكون من نوع خط واحد أو اثنين على أكثر تقدير، والفرق هو في حجم
الخط ليس إلا. هناك تصاميم تستخدم خمس أو ست أنواع من الخطوط، أنا لا أسمي هذه تصاميم
بل أسميها مأساة.
.
.
10
مشكلة الخط العربي: يحس البعض أن الخط العربي هو خط غير إعلاني، والتصاميم التي
تتضمن نص إنكليزي تكون أكثر أناقة من التصاميم ذات النصوص العربية، وهذا تصور خاطيء
تماماً، لا علاقة للغة بالأناقة، والخط العربي أكثر الخطوط أناقة على الإطلاق. المشكلة تكمن في
أن المصميم يستخدمون خطوط عربية غير مقروءة (مثلاً خط فرح)، ويصرون على أن
يستخدموا أكثر من نوعي خط في التصميم الواحد، كما أنهم لا يقيمون وزناً لأهمية الفراغ في
التصميم. وكنصيحة لأعضاء المنتدى أقول جربوا أن تستخدموا الخطوط القياسية ذات المتن
الرفيع في النصوص الطويلة، والخطوط القياسية ذات المتن العريض في العناوين، دون
مؤثرات مثل الظل أو التجسيم.
.
Sebastián Villagómez.
كيف تصبح مصمم محترف فى مجال الإعلان والدعاية (نصائح مهمة جداً)
.
11
يجب عليك كمصمم أن تفهم حقيقة مؤكدة، وهي أن القارئ، كسول دائماً. القارئ لا يحب
أن يقرأ أكثر من خمسة عشر كلمة (كأقصى حد) في إعلان ما. وهذا الأمر له أهمية كبيرة، على
سبيل المثال: إعلان عن هاتف سيار جديد، العبارات الرئيسية في هذا الإعلان هي ((عالم
بالألوان)) و ((سامسونغ)) وهي ماركة الهاتف، وهناك نص طويل عبارة عن نقاط تتضمن
المميزات الفنية والتقنية لهذا الهاتف. التصميم الصحيح، هو أن تكون كل من عبارة ((عالم
بالألوان)) و ((أريكسون)) التي هي ماركة الجهاز مكتوبتين بخط واضح وكبير. أما التفاصيل
فتكتب بخط صغير وتوضع في أحد جوانب الإعلان في الجهة السفلى. كما قلت القارئ كسول،
وهو لن يقرأ التفاصيل، المختص هو الذي سيهتم بقراءة هذه التفاصيل، وهذا الشخص ليس من
المهم إغراؤه بعبارة من مثل ((عالم بالألوان))، لأنه مهتم بالتفاصيل التقنية أكثر من الفشخرة
كون الهاتف ملون، ومعنى هذا إنه لا بأس من كتابتها بخط صغير. ولو كتبنا هذه التفاصيل بخط
كبير، فإننا سنفرط بموضوع الفراغ الأمر الذي يجعل من التصميم غير أنيق بالمره.
.
.
12
في الإعلانات التي يتم وضعها في الطرق، يجب أن لا يزيد عدد الكلمات فيها عن عشر
كلمات، فراكب السيارة التي تـنطلق بسرعة 120 كيلومتر في الساعة لن يكون قادراً على قراءة
عشرين أو ثلاثين كلمة، ناهيك عن السائق الذي يقود السيارة وهو منتبه على الطريق وغير
مستعد لقراءة عشرين أو ثلاثين كلمة. وكملاحظة مهمة يجب عدم وضع معلومات في الإعلان
الطرقي يتطلب كتابتها على ورقة من قبل الناظر، مثل رقم الهاتف أو الفاكس أو البريد
الإلكتروني.
.
.
13
لاحظتم أنني ذكرت في حديثي عدة مرات كلمة حمله إعلانية. في حقيقة الأمر إن عملية
الترويج لمنتج معين (وخصوصاً إن كان منتجاً جديداً وغير معروف من قبل الناس)، لا تصح أن
تكون عن طريق تصميم إعلاني واحد، بل عن طريق حملة تتضمن عدة تصاميم تنشر في نفس
الوقت أو في أوقات مختلفة.
.
.
ارجوو ان تكوونوو استفدتم من النصائح

الموضوع منقول للأمانة ولكن للإفادة العملية ....كيف تصبح مصمم محترف فى مجال الإعلان والدعاية (نصائح مهمة جداً)

 
قديم 31-07-2012, 12:46 AM   #2
حسين توشكا
مخالف للقوانين
افتراضي

بسم الله الرحمن الرحيم

نبتدى موضوعنا على بركه الله
أولا يا جماعه علشان تكون مصمم جرافيك ناجح فى شركه دعايه واعلان لازم يكون عندك فكره عن الدعايه والاعلان قبل ما تتقدم لاى شركه لان ده اول سؤال بيتوجه ليك من مدير الشركه لما بتروح تتقدم وكمان مش معقوله ان شركه دعايه تشغلك مصمم اعلانى عندها وانت متعرفش يعنى ايه دعايه ويعنى ايه اعلان
علشان كده اول جزئيه حنبدأ بيها هيا التعريف بالدعايه والاعلان لان الجزئيه دى مهمه جدا لاى مصمم اعلانى والجزئيه دى لو استوعبتها كويس وفهمتها جامد حتأثر عليك بعد كده فى شغلك وحتفرق معاك جامد بجد وانتوا حتحسوا بكده لما ندخل فى باقى الجزئيات التانيه ان شاء الله
ايه هيا الدعايه والاعلان ؟؟؟؟؟
ناخد المعنى العام للعباره وهوه ( الاعلان )
الاعلان ده يا جماعه زى ما موسوعه ويكيبيديا بتقول هو احد الأنشطه الاعلاميه التى لا غنى عنها للأنشطه الاقتصاديه من صناعه وتجاره وخدمات وغيرها من الانشطه الاقتصاديه وكذلك بالنسبه للمؤسسات والجمعيات الخيريه الغير ربحيه والتى بدون الإعلان عن مجهوداتها فلن تحصل على الدعم المجتمعى والتمويل المادى اللازم لاستمرارها فى عمها وادائها لرسالتها
نفسر بقى العباره بتأنى
اول جزء بيتعرض لاهميه الاعلان للانشطه الاقتصاديه وان اى نشاط اقتصادى سواء كان صناعه ( مصنع سيراميك مثلا) او تجاره (شركه توزيع مواد غذائيه ) او خدمات ( شركات الاتصالات )
اى نشاط من دول بيحتاج الدعايه جدا جدا جدا بغض النظر عن جوده المنتج او الخدمه اللى بيأديها
تخيل مثلا مصنع سيرميك ( كمثال ) فتح باستثمارات كبيره وبعد ما انتج معملش اعلانات فى التليفزيون او الجرايد عن انتاجه هل تتخيلوا انه ممكن يبيع بلاطه واحده
نبص برضه لشركات الاتصالات بصفتها اكبر ناس بتعمل دعايه دلوقتى لنفسها
ليه شركات الاتصالات عندنا فى مصر بتصرف ملايين على الدعايه
ليه كل ما تدخل شارع وتبص على السنترالات اللى فيه تلاقى اليفط بتاعته عاملاها شركه من شركات الاتصالات ؟
ليه شركات الاتصالات محاصرانا بكميه اعلانات مهوله فى التليفزيون والجرايد وفى الشارع وفى المناسبات
الاجابه يا جماعه علشان كل شركه عاوزه عدد المشتركين اللى عندها يزيد وكمان استهلاك المشتركين بتوعها يزيد
نيجى برضه لجزئيه الجمعيات الخيريه وهى ان الجمعيات الخيريه من غير ان اعلان عن نفسها مش حتاخد اى دعم نهائى
تخيل كده مستشفى الاطفال اللى لسه فاتحينها لو مكانوش عملوا ليها دعايه هل كانت حتتفتح اساسا
الاجابه طبعا لأ
معلش يا جماعه انا باطول عليكوا شويه فى الاول بس علشان ادخل فكره الدعايه فى دماغكم صح لان فيه ناس كتيره اوى فاهماها غلط
نفك دماغنا بقى دلوقتى من الامثله الكبيره بتاعه الشركات والمصانع وشركات الاتصالات ونروح للأمثله الصغيره اللى موجوده فى شوارعنا
الجزار مثلا اللى فى منطقتك
هل انت متخيل ان الجزار ده بيعمل دعايه
طبعا بيعمل دعايه بس هل الدعايه اللى بيعملها بتكون اعلان فى التليفزيون او فى الجرايد
طبعا لا بس الدعايه بتاعته بتبقى فى النطاق بتاعه
ازاى
الدعايه بتاعته حتلاقيها من اول الاكياس اللى كاتب عليها اسم المحل ودى دعايه مهمه على فكره لان فيه ناس كتير مش بترمى الكياس
وحتلاقى الدعايه دى برضه قائمه الاسعار اللى حاططها بره
وكمان فى يافطه المحل وساعات فى اليفط الصغيره ( اسمها فوانيس ) اللى بتلاقيها على قمه الشارع
نروح برضه لمثال كمان حلو
الدكتور
من المعروف ان اى دكتور لما بيفتح عياده بيعتمد اكتر على مهارته علشان ده يجيبله الزباين
يعنى بيعمل دعايه بمهارته
بس مش بيعتمد على مهارته بس ليه
لانه لو كان بيعتمد على مهارته وخبراته بس مكانش كتب اسمه على الروشته اللى بيديهالك
ومكانش كتب اسمه على اليافطه بتاعه العياده
ومكانش عمل لنفسه كروت شخصيه
ومكانش عمل لنفسه اعلانات فى الشوارع
بالتالى يا جماعه
الفكره اللى عاوز اوصلهالكم
ان اى حد بيقوم بنشاط مهما كان النشاط ده صغير بيحتاج للدعايه جدا
عاوز اوصلكم فكره ان اى حاجه عليها اى اسم لاى محل او اى منتج دى عباره عن دعايه
مهما كان المحل ده صغير ومهما كان المنتج مش مهم ومهما كان اللى بيعمل الدعايه ده مشهور اساسا
قيس كل الكلام ده على كل محل بتشوفه فى الشارع
وكمان قيسه على عيادات الدكاتره ومكاتب المحامين وشركات الكمبيوتر
ومراكز التدريب والمعاهد واى حاجه فاتحه علشان تكسب فلوس
فهمنا كده بقى يعنى ايه اعلان
نروح بقى لانواع الاعلانات
انواع الاعلانات كتيره اوى يا جماعه ومتشعبه وقابله للتطوير فى اى وقت وممكن اى فكره بسيطه تبقى اعلان ويكسر الدنيا
وانواع الاعلانات هى:
1- الاعلانات المطبوعه : وهيا دى اللى بتهمنا فى الاساس وتشمل اعلانات الصحف والمجلات والدوريات والمنشورات والملصقات
2 - الاعلانات الخارجيه : وهى اعلانات الشوارع والمعارض والاعلانات اللى على العمارات وعلى الاتوبيسات
3 - الاعلانات المسموعه : وهى الاعلانات الاذاعيه
4 - الاعلانات المرئيه المسموعه : وهى اعلانات التليفزيون ودى المنتشره اكتر وكمان فيه اعلانات السينيمات
5 - الاعلانات على شبكه الانترنت : ودى مكنتش موجوده قبل كده وظهرت مع تطور عالم الانترنت وزياده اعداد المستخدمين
وعلى فكره حنعرف بعد كده ان اعلانات الانترنت مهمه جدا جدا
6 - الاعلانات على الموبايل: ودى برضه ظهرت بعد زياده مستخدمين الموبايل
دلوقتى يا جماعه انتوا كده اخدتوا فكره عن الاعلان وانواعه
نيجى بقى للجزء اللى يهمنا وهو عن الخدمات اللى بتقوم بيها مكاتب الدعايه والاعلان
وانا اقصد المكاتب العاديه مش الوكالات الكبيره لان دى شغلها كبير اوى وعلشان توصلها لازم تاخد الخبره العمليه فى المكاتب العاديه
مكاتب الدعايه والاعلان العاديه بتشتغل فى
الكروت الشخصيه
الورق المطبوع ( فلاير)
اليفط بانواعها ( البنر والفيلكس والفنيل)
الاكياس المطبوعه
النتائج والاجندات المطبوعه
الاوراق والسجلات التجاريه ( طباعه دفاتر وفواتير التجار والشركات وروشتات العيادات وفولدرات المحامين )
تصميم مواقع وصفحاب الويب ( وده مش كل المكاتب بتشتغل فيه)
دى يا جماعه الحاجات اللى بتشتغل فيها مكاتب الدعايه والاعلان علشان يبقى عندكم فكره وكمان ان شاء الله فى الدروس اللى جايه حناخد الحاجات دى
بالتفصيل الممل من اول فكرتها وكيفيه تصميمها بسهوله وفى اسرع وقت ولغايه طبعها
وملحوظه هامه جدا قبل ما انهى درس النهارده
اهم حاجه بتهم شركه الدعايه فى المصمم اللى شغال انه يكون سريع بمعنى انه لما يتطلب منك تصميم كارت شخصى المفروض
مياخدش منك اكتر من عشر دقايق او ربع ساعه بالكتير وفى نفس الوقت يكون التصميم كويس
وخلى بالكم ده شىء مش صعب ولا مستحيل لان الاستخدام التجارى للفوتوشوب غير الاستخدام الابداعى
بمعنى ان المكتب مش بيطلب منك تطلع ابداعاتك كلها فى التصميم كل اللى بيتطلب منك افكار وتصميم كويس وخلاص
علشان كده لما واحد فيكم يشتغل مع الوقت حيلاقى نفسه بيصمم بسرعه وهوه مغمض
انا عن نفسى اول ما بدأت اشتغل فى المجال ده كنت باصمم الكارت الواحد فى حوالى ساعه
دلوقتى الحمد لله فى خلال الساعه دى اقدر اصمم خمس كروت وممكن اكتر
ومعلش يا جماعه الموضوع دلوقتى كله نظرى بس زى ما قولتلكم ده تمهيد مهم جدا لابد منه وان شاء الله فى الدروس الجايه حتعرفوا اكتر اهميه الدرس ده
واشوفكم الدرس الجاى ان شاء الله
واللى عنده اتستفسار يقول وانا ان شاء الله حارد بسرعه على قد ما اقدر
والسلام عليكم

 
قديم 31-07-2012, 12:48 AM   #3
حسين توشكا
مخالف للقوانين
افتراضي

بسم الله الرحمن الرحيم


الدرس الثانى

اتكلمنا يا جماعه فى الدرس اللى فات عن فكره الدعايه والاعلان وانواع الدعايه ومجال عمل مكاتب الدعايه

النهارده بقى حنتكلم عن مهارات الفوتوشوب المطلوبه من المتقدم للعمل فى مكتب دعايه

بس الدرس ده مش تعليمى للفوتوشوب لان المنتدى فيه مواضيع كتيره اوى عن تعليم وشرح الفوتوشوب وكلها مواضيع ممتازه

انا حتكلم بس عن درجه استخدام الفوتوشوب المطلوبه للشغل بتاعنا

بصوا يا جماعه زى ما قولت قبل كده

اى مكتب دعايه مش بيهمه خالص ان المصمم اللى جاى يشتغل يكون راجل مبدع فى الفوتوشوب

اهم حاجه يكون بيعمل المعادله دى

تصميم كويس فى وقت قليل

دى المعادله المهمه اوى لاى مكتب دعايه

واحد دلوقتى يجى يسال يقول طب ليه مكتب الدعايه مش بيهمه ان المصمم يكون مبدع فى الفوتوشوب

الاجابه علشان المصمم لو قعد فى كل تصميم يتطلب منه يبدع فيه معنى كده انه حياخد وقت اكتر وفيه احتمال بعد كده انه ميعجبش العميل اللى طلب التصميم من الشركه ( وده احتمال وارد فى اى تصميم ) وبالتالى ساعتها حيتعمل فيه تعديلات كمان ووقت تانى

لكن لو التصميم كويس وعادى ومعمول بسرعه وجه بعد كده العميل عاوز يعدل فيه حيبقى سهل فيه التعديل ومش حياخد وقت

والاهم من كده ان اغلب الفلاتر اللى فى الفوتوشوب لما بتطبع بعد كده مش بتبقى كويسه فى الطباعه

كمان بيعدى على مكاتب الدعايه اوقات كتيره بيبقى الشغل فيها كتير والتصميمات المطلوبه كتير اوى ولازم تخلص بسرعه لان العميل بتاع الدعايه

بيبقى عاوز حاجته جاهزه ومطبوعه فى اسرع وقت وفى نفس الوقت كويسه

علشان الاسباب دى كلها شركات الدعايه بتفضل المصمم السريع اللى تصميماته كويسه عن المصمم البطىء اللى تصميماته جامده وكلها ابداع

بالتالى انا بانصح اى واحد هنا عاوز يروح يقدم فى شركه دعايه انه يتعامل مع الفوتوشوب بطريقه السهل الممتنع

بمعنى انك تشوف التصميم المطلوب منك عاوز ايه بالظبط وتعمله

مثلا لما يتطلب منك تصميم كارت شخصى طبعا بيدوك البيانات والعميل عاوز الكارت لونه ايه او الخلفيه شكلها ايه والصور اللى فى كارت ايه والكلام ده

انت تاخد البيانات وتكتبها فى التصميم وتنسقها وتحط الخلفيه اللى عاوزها العميل والصور اللى طالبها وتنسق ده كله فى التصميم حتلاقى الكارت مقعدش معاك

اكتر من ربع ساعه

يعنى مثلا اتطلب منك تصمم كارت لسنترال

طبعا بيدوك بيانات الكارت ( اسم السنترال - اسم صاحب السنترال - رقم موبايل صاحب السنترال - ارقام السنترال - عنوان السنترال )

وكمان فى اوقات كتيره بيدوك الخلفيه بتاعه التصميم اللى عاوزها صاحب السنترال ( المندوب اللى بيروحله هوه اللى بيديك الكلام ده كله )

انت وظيفتك بعد ده كله انك تفتح الفوتوشوب وتفتح صفحه جديده على مقاس الكارت وده فى اغلب الشركات بيبقى اكشن فى الفوتوشوب

المهم

انت اول حاجه بتجيب الخلفيه اللى اختارها صاحب الكارت ( ودى بتكون فى تصنيف بتعمله شركات الدعايه للكروت اللى طبعتها قبل كده)

وبعد ما تحط الخلفيه بتكتب البيانات وتوزعها فى شكل كويس فى التصميم ( ومع الوقت مش حتتعامل غير مع توزيعتين او تلاته )

وبعد كده تحط كام صوره موبايل وكام لوجو لشركات الاتصالات

بس كده خلاص الكارت خلص والتصميم بيبقى كويس وبيعجب العميل

نفس الكلام ده تطبقه على مواد الدعايه التانيه

زى الفلايرز او البورشور

دى برضه بيدوك بياناتها والعميل طالب ايه

وانت بتعمل الكلام ده كله والعميل بيعجبه الشغل وبيتطبع وكله بيبقى تمام

ونفس الشىء بالنسبه لتصميم الدفاتر التجاريه

بيبقى عندك تصميمات دفاتر قديمه بتطلعها من على الكمبيوتر وتعدل بياناتها على التصميم المطلوب منك وبتخلص فى اسرع وقت

وعلى فكره درجه مهاره الفوتوشوب المطلوبه لانجاز المهام دى كلها درجه بسيطه وعاديه مش مطلوب منك تبقى راجل محترف فوتوشوب اوى

علشان كده فيه فرق بين اللى بيتعلم فوتوشوب تجاريا وبين اللى بيتعمله اكاديميا

اللى بيكون اتعلم فوتوشوب اكاديميا بيكون فى الاول بطىء فى التصميم وبيبقى محتار يعمل ايه فى التصميم لانه متعلم الفوتوشوب علشان ده ينفعه هوه لنفسه

لكن اللى متعلم الفوتوشوب تجاريا ده بيبقى سريع جدا فى انجاز التصميمات المطلوبه منه لانه بيبقى عارف دماغ الزبون كويس وعارف ايه اللى بيعجب الزباين وايه اللى مش بيعجبهم

طب يعنى ايه مستخدم تجارى للفوتوشوب ؟ وازاى اوصل للمرحله دى وانا لسه فى الاول او اتعلمت الفوتوشوب اكاديمى؟

اولا المستخدم التجارى للفوتوشوب هوه زى ما قولت ده اللى بيبقى سريع جدا فى انجاز تصميمات العملاء وبرغم سرعته الا ان تصميماته بتعجب الزبون بغض النظر عن جمال التصميم لكن بتعجب الزبون علشان المصمم عارف دماغ الزبون كويس

طب ازاى المصمم يعرف دماغ الزبون

ده بيجى مع الخبره العمليه فى مجال الدعايه ومينفعش تتعلمه نظرى

اهم حاجه فى الاول ان المصمم يبقى سريع

ثانيا : الوصول لمرحله الاستخدام التجارى سهله ومش صعبه لان زى ما قولت مش مطلوب منك تبقى محترف البرنامج او مبدع فيه وكفايه يبقى عندك فكره كويسه عن البرنامج ومع التمرين على الشغل التجارى حتبقى تمام اوى

ثالثا : بالنسبه للى بيكون متعلم فوتوشوب وعنده فكره كويسه اوى عنه بس اتعلمه اكاديمى ده برضه سهل انه يتعلم ازاى يستخدم الفوتوشوب تجاريا وده بيكون عن طريق انه لما يجى يصمم شغل تجارى ينسى الحاجات اللى كان بيعملها قبل كده مع نفسه ويعمل اللى مطلوب منه بالظبط من غير زياده ومن غير ما يلف ويدور حوالين نفسه ولما يجى يعمل تصميمات لنفسه يبقى يعمل فيها اللى هوه عاوزه

خلاص يا جماعه عرفنا الفرق بين الاستخدام التجارى والاستخدام العادى ( الاكاديمى)

نيجى بقى لنقطه ايه الحاجات المطلوب تعلمها فى الفوتوشوب علشان تبقى مستخدم تجارى

اهم اداوت الفوتوشوب المطلوبه ودى اهم اداه مطلوبه فى الاستخدام التجارى على الاطلاق هى

pen tool

وده اداه قص ومهمه جدا فى شغل الدعايه وعلى فكره لما بيتعملك تيست فى الفوتوشوب لما تيجى تشتغل فى اغلب الحالات حيتطلب منك تقص بالاداه دى الاول

وانا بكرر يا جماعه الاداه دى مهمه اوى فى شغل الدعايه وفيه ناس كتير اوى بتبقى عارفه الفوتوشوب بس مش بتستخدم الاداه دى خالص

وانا عن تجربه ليا انا ساعات بيجيلى المكتب مصممين طالبين شغل ولما باعملهم تيست اول حاجه باطلبها منهم انهم يقصوا بالاداه دى واغلب اللى بيجوا بيبقوا مش عارفينها اساسا رغم ان بيبقى فيه ناس كتيره منهم فى فنون جميله والفوتوشوب ده من ضمن دراستهم

عرفنا خلاص يا جماعه ايه اهم اداه

بقيت الاداوت المهمه برضه

marquee tool

move tool

magic tool

stamp tool

gradient tool

type tool

+

تكون بتعرف تتعامل مع ال

layers

blending options

بس كده من ضمن اداوت الفوتوشوب كلها دى اهم الادوات واغلب الاداوت اللى حتسخدمها فى 95% من التصمميات اللى حتجيلك

وطبعا يا جماعه المنتدى هنا مليان شروحات للادوات دى كلها واى حد هنا لو معندهوش فكره عن الفوتوشوب خالص يقدر يبص على الشرح بتاعهم فى المنتدى والشروحات بتاعتهم كلها بسيطه وسهله ومفيهاش اى حاجه اهم حاجه بس طبعا التمرين

وفى اخر الجزئيه بتاعه النهارده احب اقول لكل اللى عارفين الفوتوشوب كويس وقرأو الموضوع وعاوزين يشتغلوا فى الدعايه انهم يركزوا على ناحيه السرعه فى التصميم وانا برضه حاجيب ان شاء الله كام صوره لكروت شخصيه وفلايرات وبنرات وحاشرح فكره سرعه تصميمهم فى الدرس الجاى ان شاء الله

والسلام عليكم ورحمه الله

 
قديم 31-07-2012, 12:49 AM   #4
حسين توشكا
مخالف للقوانين
افتراضي

بسم الله الرحمن الرحيم


النهارده يا جماعه انا جايب صوره لكارت شخصى وحاشرح فكره سرعة تصميمه

نبدأ على بركه الله

فى درس النهارده يا جماعه حتكتشفوا ان تصميم الكروت الشخصيه سهل جدا ومفيهوش اى صعوبه

اول كارت انا جايبه ده كارت لشركه قطع غيار سيارت ادخل على الرابط


كيف تصبح مصمم محترف فى مجال الإعلان والدعاية (نصائح مهمة جداً)



لو بصينا فى الكارت بتأنى حنلاقى عناصره تتكون اول

1- اسم الشركه او اسم الكارت ( شركه الرشيدى )

2- نوع النشاط ( قطع غيار سيارات)

3- اسم مدير الشركه ( اسلام الرشيدى)

4- عنوان الشركه

5- تليفونات الشركه

6 - خلفيه عاديه

7 - صور لوجوهات ماركات قطع غيار سيارات ( فولكس وسيات وسكودا واودى)

8- صوره عربيه سكودا

بس كده ادخل على الرابط



كيف تصبح مصمم محترف فى مجال الإعلان والدعاية (نصائح مهمة جداً)



دلوقتى تخيل نفسك روحت قدمت فى شركه دعايه واشتغلت خلاص وجالك مندوب ومعاه بيانات الكارت ده وعاوز بروفه لتصميم للكارت

حتعمل ايه

اولا فيه مبادىء عامه المصمم بيمشى عليها

1- ان توزيع البيانات مهم اوى فى الكارت ( زى ما احنا شايفين ان شركه الرشيدى مكتوبه بحجم كبير فى نص الكارت وتحتيها اسم النشاط بحجم اصغر

شويه وتحتيهم اسم المدير وتحت خالص العنوان ثم التليفونات)

التوزيعه دى فيه غيرها توزيعه تانيه مش بعيده عنها وحنشوفها برضه والتوزيعتين دول مش بيخرج عنهم اى تصميم

يبقى انت دلوقتى كده خلاص عارف التوزيعه وحتعملها وانت مغمض ومش حتتلخبط وتاخد وقت

2- الالوان

ودى مهمه جدا وطبعا كل مصمم لازم يبقى عنده حس فى التصميم وميعملش الوان مش جايه على بعضها بس فى نفس الوقت ميفتحش خصائص الليرز

ويقعد يجرب الالوان كلها

علشان كده فيه قاعده اساسيه بالنسبه لالوان العنوان والتليفونات

كل العناوين والتليفونات اللى تكتبهم فى الكارت تكتبهم باللون الاسود وحواليه تحديد ابيض )Strocke)

او العكس اللون ابيض وحواليه تحديد اسود ( زى الكارت اللى قدامنا)

والاسود او الابيض بيجوا مع اى لون فى الخلفيه

3 - تالت حاجه نراعى الوان الصور اللى بتتحط فى التصميم

بس طبعا لو الصور اللى فى تصميم صور لوجوهات لماركات مش حنيجى جمب الوانها طبعا

لكن لو صوره عاديه ( زى صوره العربيه اللى فى الكارت ) احنا شايفين ان العربيه لونها احمر

هل كان ينفع ان العربيه يبقى لونها اخضر مثلا

هل كان ينفع ان لونها يبقى ازرق

كان حيحصل كوكتيل فى الوان الكارت طبعا

طب دلوقتى لو انت بتصمم الكارت ده ودورت فى صور العربيات اللى عندك ملقتش غير عربيه سكودا خضراء حتعمل ايه

ببساطه تغير لونها علشان يمشى مع التصميم او تدخل على جوجل وتكتب اسكودا وتشوف الوان العربيات اللى حتجيلك ايه

العمليه بسيطه ومفيهاش حاجه

تخيل نفسك دلوقتى بتعرف فوتوشوب كويس واشتغلت فى شركه واتطلب منك تصمم الكارت ده عارف ايه اللى حيحصل

اولا : حتقعد ساعه تكتب بيانات الكارت علشان انت حتكتب البيانات وبعد كده حتقلب فى الخطوط اللى فى البرنامج علشان كل جمله فى الكارت تكتبها بخط معين

وبعد ما تخلص من البيانات حتوزعهم توزيع غريب ومش حيبقى فيه تناسق بين انهى كلمه تبقى كبيره وانهى كلمه تبقى صغيره

ثانيا : حتقعد ساعه برضه تقلب فى الخلفيات اللى عندك فى الكمبيوتر علشان تختار واحده تصمم عليها

ثالثا: حتقد ساعه تالته تدور على صور الوانها تعجبك

بعد التلت ساعات دول بص بقى للتصميم

حتلاقى التوزيعه اولا وحشه

كتره الخطوط فى الكارت مش عامله تناسق

حتلاقى مفيش تناسق بين الكلام اللى المفروض يبقى كبير والكلام اللى المفروض يبقى صغير

حتلاقى انك مدى البيانات استروكات الوانها غريبه ( اصفر واحمر واخضر وكده)

وفى الاخر المندوب حياخد منك البروفه ولما يشوفها العميل حيطلب تغيير التصميم كله

الكلام ده يا جماعه بيحصل فعلا وانا مش بخترع وحصل قدام عينى وحصلى انا كمان لما كنت لسه فى بدايه حياتى العمليه فى التصميم التجارى

نرجع بقى للكارت بتاعنا ونشرح تصميمه وازاى تعمله بسرعه

اولا حتفتح صفحه فى الفوتوشوب عادى جدا بمقاس الكارت ( عامه بيبقى مقاس الكروت 8.5 فى 5.4 )

ثانيا : الخلفيه ودى مهمه جدا

حل الخلفيه بقى انك تكون عارف مكان كروت العربيات اللى اتعملت قبل كده وعارف اشكال كويسه منهم بحيث انك تجيب تصميم مطبوع قبل كده وتاخد خلفيته

وتشتغل عليها

الحل التانى وده الاسهل والبسيط

(gradient) انك تعمل زى ما معمول فى الكارت ده الخلفيه عباره عن جاريديانت

اورانج فى رصاصى

وعندك كميه جاريدينت فى الفوتوشوب جميله اوى

يعنى مثلا لو المندوب قالك ان صاحب الكارت عاوز الكارت هادى او بيحب الالوان الفاتحه اعمل جاريدينت ازرق فى ابيض مثلا وحتلاقيها جميله جدا

ولو المندوب قالك ان صاحب الكارت بيحب الالوان الغامقه اعمل زى الكارت ده واديها اورانج فى رصاصى بحيث الرصاصى يدى الغمقان اللى الزبون عاوزه

وفى نفس الوقت الاورانج يفتح الكارت شويه علشان الكارت ميبقاش كئيب

ثالثا: البيانات

وهنا لازم نتكلم عن الخطوط

بصوا يا جماعه اى مصمم تجارى لازم يعود نفسه انه يشتغل بخطوط معينه ميغيرهاش

يعنى بالنسبه للخطوط العربيه المصمم يشتغل بالخط العادى اللى زى فى الكارت ده وعنده الفارسى والاندلسى جميل برضه وفونت قناه العربيه

دول كفايه

اما بالنسبه للخطوط الانجليزى ف دول كتير اوى وبتلاقى الجامدين كتير فيها علشان كده المصمم يحاول برضه يحفظ اسم كان فونت انجليزى جامد وميشتغلش غير بيهم ويبقى يجرب الخطوط التانيه لو هوه قاعد رايق

كده خلصنا من الخطوط

كتبنا البيانات

نوزعها

نراجع بقى نشوف احنا عملنا ايه لغايه دلوقتى

1 - فتحنا صفحه تصميم جديد

2 - عملنا خلفيه فى الانجاز

3 - كتبنا البيانات ووزعناها

بعد كده بقى نشوف الكارت محتاج ايه تانى

زى الكارت بتاعنا مثلا كان مطلوب فيه اللوجوهات اللى انتوا شايفنها نجيبها ونوزعها بضمير برضه

وصوره عربيه حلوه نجيبها ونقصها ونحطها فى الكارت

وبعد كده نظبط الوان البيانات اللى فى الكارت

وعلى فكره فى اغلب الصور او اللوجوهات اللى بتتحط فى الكروت بتاخد اوتر فى الفوتوشوب علشان بيخليها تنور زى ما انتوا شايفين

كده خلاص الكارت جاهز

المندوب بياخد منك البروفه والزبون بيتكيف اوى من التصميم ولو عاوز تعديل بيقولك مثلا تكبر اسم الشركه شويه او اسمه هوه شويه او توضح العنوان اكتر كده يعنى حاجات رفيعه

كده يا جماعه

وكمان دى صوره لضهر الكارت( الكروت نوعين نوع وش واحد ونوع تانى وش وضهر)

ولو تلاحظوا حتلاقوا ان الخلفيه بتاعه الضهر نفس خلفيه وش الكارت

وكمان تصميمها بسيط

ادخل على الرابط


كيف تصبح مصمم محترف فى مجال الإعلان والدعاية (نصائح مهمة جداً)


اخدنا اللوجوهات حطناهم بشكل ظريف واخدنا اسم الشركه كبرناه على الاخر

عملنا تحديد حلو واديناه جاريديانت الخلفيه وخلاص ( pen tool)وبأداه

واوقات كتيره برضه صاحب الكارت بيطلب ان وش الكارت يبقى بالعربى زى الكارت ده والضهر بالانجليزى

كل ما عليك فى الحاله دى انك تعمل نفس الخلفيه طبعا ونفس اللوجوهات ونفس الصور اللى فى الوش تبقى اى الضهر وتترجم البيانات العربى لانجليزى وخلاص

لو انتوا طبقتوا الكلام ده يا جماعه على تصميم الكارت ده

الكارت مش حياخد اكتر من ربع ساعه

وكمان فيه نقطه مهمه

ان المصمم لما يشتغل لازم يبقى ليه ادواته المعينه اللى بيشغل بيها وبينجز بيها شغله والاداوت دى هيا

1- تصميمات سابقه عملها هوه او غيره عملها ودى يصنفها ( يعنى تصميمات السنترالات تتحط فى فولدر لوحدها وتصمميات السيارات فى فولدر لوحدها وهكذا )

والتصميمات ده بتفيده فى انه لما بيتطلب منه تصميم كارت معين بيبص فى التنصيف بتاع الكارت المطلوب منه ويختار كارت حلو كان عمله قبل كده ويصمم عليه وده بينجز جامد وخصوصا فى حاله تكدس الشغل

2- مجموعه خطوط معينه بيشتغل بيها سواء خطوط عربى او انجليزى وطبعا مفيش مانع من التجديد فى الخطوط دى كل فتره بس اهم حاجه يكون حافظهم وملم بيهم

3 - يكون فاتح الانترنت دايما على صفحه جوجل علشان فى اى وقت ممكن يتطلب منه تصميم معندهوش صور كفايه ليه على الكمبيوتر ف يدور على جوجل وده بينجز اوى

بس يا جماعه دى ادوات المصمم اللى بيقدر بيها انه ينجز فى اى شغل يجيله

طبعا دلوقتى لو واحد فيكم قرأ الموضوع ده وهوه ميعرفش حاجه عن الفوتوشوب حيفتكر الحكايه صعبه

لكن انا باقول ان العمليه سهله اوى

انا باقول لكل واحد ميعرفش فوتوشوب خالص انه يتعلم الادوات اللى كنت قايل عليها

وكفايه كده اوى فى الاول

وهوه مع الوقت حيبقى كويس

وخلى بالكم يا جماعه ان المصمم التجارى مع الوقت بياخد خبره رهيبه فى شغله وبيبقى فى الاخر بيعمل التصميمات وهوه مغمض بس اهم حاجه ان المصمم يحاول دايما يطور من نفسه علشان يوصل لمراحل اعلى فى شغل الدعايه يمكن ربنا يكرمه بعد كده ويشتغل فى بوسترات الافلام

وان شاء الله الدرس اللى جاى حاجيب صور لبقيه شغل الدعايه ( الدفاتر والفلايرز واليفط) وحاشرحهم برضه وحابين طريقه سرعه تصميمهم وانا يا جماعه حاطط فى المرفقات ملف فيه الصور اللى استخدمتها فى التصميم بتاع كارت النهارده يا ريت كل اللى مهتم بموضوع الدعايه وعاوز يبقى مصمم يبقى ينزل الصور دى ويقعد مع نفسه على روقان ويصمم الكارت ده ويشوف فى الاخر هوه قعد وقت قد ايه فى تصميمه وربنا يكرم كل مجتهد

والسلام عليكم ورحمه الله وبركاته

 
قديم 31-07-2012, 12:52 AM   #5
حسين توشكا
مخالف للقوانين
افتراضي

ملخص الثلث دروس


اولا : فكره عامه عن الدعايه وانواعها

ثانيا : مهارات الفوتوشوب المطلوبه للدعايه

ثالثا: تصميم كارت شخصى بسرعه وانجاز وجبت كارت وشرحته

النهارده بقى

عاوز كل واحد يسأل نفسه هوه عاوز ايه بالظبط من الفوتوشوب

مجرد انه يتعلمه وخلاص ويروح يشوف اى درس فى الفوتوشوب ويتعلمه ويجيب فى صور واستايلات وفلاتر وفرش ........ الخ

طب وفى الاخر ايه الغرض

ايه لازمه واحد عارف الفوتوشوب كويس جدا ومستواه عالى جدا فيه ورغم كده كل استفادته من البرنامج تنحصر فى انه بيعمل تصميمات لنفسه ولقرايبه ولحبايبه وتوقيعات ...... الخ

النهارده مش حنتكلم عن حاجه بالنسبه للتصميمات

حنتكلم عن حاجه مهمه جدا لازم تعرفوها من دلوقتى قبل ما نكمل الدروس وده علشان انا اكتشفت ان فيه ناس كتيره هنا نفسها تشتغل فى المجال ده فانا عاوزها تبقى عارفه هيا حتبقى ماشيه ازاى

اللى عاوز اوصلهولكم يا جماعه ان اى واحد مصمم فى مكتب دعايه مش مطلوب منه ابداع مش تقعد تعمل نفسك دافنشى وتقعد تجرب الفرش والخلفيات والصور والالوان والخطوط

الحاجات دى تعملها فى حالتين

يا اما انت شغال فى مكتب تصميم بس مش دعايه فى الحاله دى بيبقى المطلوب ان المصمم يكون حسه الفنى عالى علشان مكاتب التصميم كل وظيفتها انها تصمم بس فبياخدوا راحتهم فى الوقت فبالتالى لازم يطلعوا حاجه كويسه

الحاله التانيه انك تكون قاعد فى البيت ومعاك كوبايه الشاى والسيجاره وقاعد اخر مزاج وعاوز تعمل تصميم

بس فيه حاجه عاوز اوضحهالكم من دلوقتى

اوعى حد فيكم يفتكر انى باقوله متبقاش مبدع فى الفوتوشوب او متبقاش مستواك وحسك الفنى عالى

لا

تكون مبدع ومستواك عالى وراجل فاهم البرنامج كويس

لكن ساعه الشغل تنسى اى حاجه ممكن تخليك تاخد وقت فى التصميم

لكن فى الاول والاخر لازم يكون برضه مستواك عالى

عميل مثلا طلب من شركتك انها تطبعله بروشور مثلا

طبعا البروشور مهم للزبون جدا علشان ده واجهه ليه وبالتالى مش بيبقى عايز اى تصميم والسلام

فى الحاله دى بقى حتطلع مواهبك براحتك

وكمان برضه لازم فى خلال شغلك تحاول دايما تطور من نفسك ومن تصميماتك

وحطوا تحت كلمه تطور من نفسك ومن تصميماتك مليون خط

ازاى تطور من نفسك فى البرنامج وتطور تصميماتك فى الدعايه

تدخل مثلا على النت تشوف صور حلوه ممكن تنفعك فى شغلك وطبعا انت حتكون ساعتها عدى عليك شغل كتير وتقدر تحدد ايه الصور اللى حتنفعك وايه اللى مش حتنفعك وبالتالى تصميماتك حتتطور

تشوف برضه تصميمات لمكاتب تانيه وتحاول تلاحظ هما عاملين ايه جديد فيها وتطبقه انت مع نفسك

تتابع كل جديد فى مجال الدعايه وفى مجال التصميم

تمشى فى الشارع تبص على اليفط ولما تدخل مطعم تبص على تصميم المنيو ويوم ما حد يديك فلاير بعد صلاه الجمعه تبص تصميمه عامل ازاى

من الاخر تتابع شغل السوق عامل ازاى وتحاول دايما انك تسبقه

كده حتلاقى نفسك مع الوقت بتتطور جدا وحتلاقى نفسك وصلت لمرحله انك تعمل تصميم جامد جدا وفى خلال وقت صغير جدا برضه

ساعتها بقى تقدر تروح تشتغل فى مكتب للتصميمات بس ودول فلوسهم كويسه

او تروح تقدم فى وكاله اعلانيه كبيره

احنا دلوقتى فى مرحله تكوين مصمم الدعايه

تصبر على نفسك ومتستعجلش وكل حاجه حتعرفها وحتفهم الشغل كويس بس ده بالوقت وبالخبره ومفيش وكاله كبيره حتشغلك الا لو كنت راجل خبره ولو مش مصدقين بصوا فى الشروط اللى بتحطها وكالات الاعلان الكبيره حتلاقى اهم شرط الخبره وده طبعا فى اى شغله عامه

انا دلوقتى باحطكم على اول الطريق

الطريق اللى لو انتوا مسكتوا فيه وشويه تعب كمان وشويه صبر

حتوصلوا لمرحله الشغل العالى

علشان كده محدش فيكم يحط فى دماغه ان الموضوع ده انا عامله علشان تشتغل فى مكتب دعايه وخلاص

لا الموضوع ده علشان تعرف تشتغل فى مكتب الدعايه وعن طريقه تاخد الخبره المطلوبه اللى حتوصلك لمستويات عاليه جدا فى الدعايه

بالتالى

حنحدد من دلوقتى الغرض من الدوره دى ايه علشان كله يبقى عارف احنا ماشيين ازاى

1 – تعرفوا مفهوم الدعايه

2 – تعرفوا ايه المهارات الاوليه المطلوبه منك فى الدعايه

3 – تعرفوا قيمه الوقت فى الدعايه

4 – تعرفوا ازاى تشتغلوا فى مكتب دعايه

5 – تعرفوا ازاى تطوروا من نفسكم فى الدعايه

6 – تعرفوا ايه هيا الطباعه وتصميمك بيحصله ايه فى الطباعه

7 – اخيرا تعرفوا ازاى تعدوا من مرحله المكاتب العاديه

علشان كده انا باقول من دلوقتى ان اهم حاجه الطموح فى الشغلانه دى

بس برضه لازم الصبر

مش تكون طموح ومستعجل وعاوز تتقدم بسرعه

الصبر حلو وبيعلم احسن والحاجه اللى الواحد بيعرفها عملى وبياخد فيها وقت عمره ما بينساها

يا ريت تكون فكره الدوره وازاى هيا ماشيه وصلت لكم علشان ده يهمنى جدا علشان الموضوع ميهربش من ايدنا

وفى الاخر انا باقول ان الموضوع ده مجهود شخصى ليا والموضوع ده هوه الموضوع الوحيد فى المجال ده على الانترنت ومفيش موضوع مماثل حتى ليه علشان كده انا مش باسمح لاى حد انه ينقله لاى منتدى تانى وحق نقله محفوظ ليا انا بس

واشوفكم فى الدرس اللى جاى قريب ان شاء الله

 
قديم 31-07-2012, 12:56 AM   #6
حسين توشكا
مخالف للقوانين
افتراضي

بسم الله الرحمن الرحيم

نبدأ على بركه الله درس النهارده
النهارده بقى يا جماعه اعذرونى انا حاتكلم عن الكروت الشخصيه تانى وده راجع لان الكروت الشخصيه دى اهم واكتر حاجه بيشغل فيها المصمم فى مكتب الدعايه لان مكاتب الدعايه العاديه نشاطها الاساسى قائم على الكروت الشخصيه
بس النهارده حنتكلم عن الكروت الشخصيه من جهه تانيه غير جهه التصميم
حنتكلم من جهه التصميم لما بيتطلب منك
دلوقتى انت راجل شغال فى مكتب خلاص
جالك المندوب ومعاه بيانات الكارت
قالك البيانات اهى
عاوز التصميم دلوقتى علشان الحق ادى البروفه للعميل
حتعمل ايه
تقوم فاتح صفحه التصميم زى ما قولنا على المقاس بتاع الكارت العادى
وتبدا تشتغل
طب ايه اللى حتعمله بالظبط علشان تخلص التصميم فى اسرع وقت
اولا : تجيب خلفيه للكارت ( وخلى بالكم الخلفيه دى بالذات المندوب الشاطر بيقرا دماغ العميل وبيقولك اذا كان العميل عاوز الكارت هادى ولا غامق ولا مليان )
ف لو العميل عاوز الكارت هادى بتختار خلفيه هاديه ولو عاوزه غامق بتختار غامقه وهكذا
ثانيا: تكتب بيانات الكارت وبعد ما تخلص كتابه البيانات تنسق البيانات من حيث
الحجم والشكل والتوزيع
الحجم : هوه انك تراعى ان فيه كلام حيبقى حجمه كبير بالعاده وكلام اصغر منه
( اسم الكارت مثلا بيبقى اكبر من العنوان واسم المدير اكبر من رقم الموبايل وكده)
الشكل : وده يعنى الخط اللى حتستخدمه فى الكتابه
طبعا الخط اللى حتستخدموه هوه الخط العادى خالص بس اسم الكارت طبعا ممكن تكتبه بفونت تانى مميز شويه وبرضه اسم المدير ممكن يتكتب بفونت مميز بس يكون زى الفونت اللى اتكتب بيه اسم الشركه وبقيه البيانات بالفونت العادى خالص
معنى كده ان الكارت الواحد المكتوب بالعربى الاحسن والاسرع انك متستخدمش فيه غير خطين
الخط العادى وخط تانى مميز ( اندلسى- فارسى ...... الخ )
التوزيع : وده برضه مهم جدا
التوزيع ده عباره عن ايه
التوزيع عباره عن انك تنسق بيانات الكارت فى مساحه الكارت نفسه
بحيث فى الاخر تلاقى بيانات الكارت مترتبه كويس ومتوزعه تمام فى الكارت
يعنى اسم الكارت مثلا يبقى فوق خالص فى النص زى الكارت اللى جبتهولكم قبل كده
وممكن برضه يتحط فوق على اليمين
وتحت اسم الكارت يتحط اسم النشاط ( زى ما موجود فى الكارت اللى جبته قبل كده)
وفى النص يتكتب اسم المدير وتحته على طول رقم موبايله
واخيرا تحت خالص فى النص يتكتب العنوان وارقام التليفونات
يبقى كده خلاص احنا اتكلمنا عن
أولا/ خلفيه الكارت ثانيا/ كتابه بيانات الكارت
ثالثا بقى/ الوان الكتابه
ودى بتكون على حسب لون الخلفيه
يعنى لو الخلفيه زرقاء يبقى اللون الاحمر حيبان عليها
بترجع فى الاخر للمصمم
بس على قد ما تقدر ما تحطش الوان كتير
يعنى مثلا اسم الشركه بلون ظاهر عن لون الخلفيه
وكمان اسم المدير نفس النظام ويفضل ان اسم المدير يبقى بنفس اللون بتاع اسم الشركه
لون العنوان دايما بيبقى اسود وواخد تحديد ابيض او يبقى اللون ابيض وواخد تحديد اسود
وخلى بالكم التحديد strock
مهم جدا
يعنى كل البيانات تديها تحديد ابيض علشان تظهر اكتر وكمان شادو اسود
والكلام ده كله حتلاقوه فى
Blending Options
رابعا : فاض الصور بتاعه الكارت
ودى طبعا على حسب النشاط بتاع صاحب الكارت
يعنى كارت السنترال يبقى فيه صور موبايلات ولوجوهات فودافون وموبينيل والكلام ده
وكارت السيارات يبقى فيه صور سيارات طبعا وصور لوجوهات شركات السيارت
وكارت السوبر ماركت يبقى فيه صور مواد غذائيه وهكذا فى اى كارت
ودايما فى الصور اللى بتحطها فى الكارت لازم تكون مقصوصه كويس
وطبعا توزعها فى الكارت بشكل كويس
ويفضل تديها outer glow
علشان تبان اكتر
خلاص كده الكارت خلص
طبعا زى ما قولت قبل كده اكتر حاجه بتخلى مصمم الدعايه المبتدىء ياخد وقت فى تصميم الكارت هي الخلفيه والكتابه
بعد الكلام اللى قولناه ده متهيالى مفيش صعوبه
ومع التمرين ومع كتر الشغل ومع الخبره حتعمل الكارت وانت مغمض
وحيجيلك المندوب تقوله استنى عشر دقايق والتصميم حيبقى جاهز
اتعرضنا النهارده خلاص للكروت الشخصيه مره تانيه واعذرونى على تكرار الكروت بس صدقونى هيا دى اكتر حاجه حتواجهكم لو اشتغلتوا فى مكتب دعايه علشان كده عاوز اتأكد انكم شربتوها
دلوقتى بقى نيجى للجزء العملى بتاعنا
واللى بيحدد لكل واحد فيكم هوه استفاد من الدرس ولا لأ
دلوقتى انا حاعتبر نفسى مندوب وانتوا المصممين
وحاديكم بيانات كروت وانتوا تصمموها
وكل واحد يصمم الكارت يجيبه هنا ويوريهولى ويقول هوه قعد فيه قد ايه
وانا احددله العيوب اللى فى الكارت
على فكره الكلام ده مهم جدا علشان لو واحد فيكم راح يقدم فى مكتب
حيقعدوه على الكمبيوتر ويقولوله قدامك الصور اللى عندنا والفونتات وكل حاجه
اعملنا كارت سنترال مثلا
ف انت لو متدرب كويس حتعمل الكارت بسرعه وكفاءه
حيقوم صاحب المكتب مشغلك على طول
------------------
البيانات
اولا / تصميم كارت لشركه قطع غيار سيارات
اسم الشركه: اليكس كار
نوع النشاط: قطع غيار السيارات
اسم المدير/ محمد سعيد
رقم موبايل المدير / 0105558884
العنوان/ 88 شارع ملك حفنى – سيدى بشر – الاسكندريه
رقم تليفون الشركه / 5412874
الراجل ده عاوز الكارت هادى
وعاوز صوره عربيه اوبل
وعاوز لوجو فولكس فاجن واوبل وسكودا ورينو
خلاص اهو معاكم بيانات الكارت اعملوه
-------------
ثانيا / تصميم كارت سنترال
اسم السنترال / موبى فون
نوع النشاط / مكالمات محليه ودوليه وكروت شحن واكسسوارات موبايلات وتحويل مكالمات للمنازل
اسم المدير/ احمد على
موبايل المدير/ 0107854985
العنوان / 56 شارع الجبرتى – باب شرق – الاسكندريه
رقم تليفون السنترال/ 4857459
الراجل عاوز الكارت غامق
وعاوز لوجو فودافون وموبينيل وكام صوره لموبايلات حديثه

خلصنا خلاص درس النهارده ومستنى تطبيقهم واللى ميعرفش الفوتوشوب مش مطلوب منه غير الادوات اللى فى الصوره والكلام ده برضه للى بيعرف الفوتوشوب


كيف تصبح مصمم محترف فى مجال الإعلان والدعاية (نصائح مهمة جداً)

واعدادات المقاس
9 عرض و 5 طول وريزليوشن 300
مستنى تطبيقكم ويا ريت تشرفونى
والسلام عليكم ورحمه الله وبركاته

 
قديم 31-07-2012, 01:35 AM   #7
AREEG
اسطوره لن تتكرر
 
الصورة الرمزية AREEG
افتراضي

السلام عليكم حسين
للاسف ياحسين ممنوع وضع اي مواضيع منقوله على الاطلاق
يغلق وينقل للارشيف
ومنتظرين جديدك الحصري

 
موضوع مغلق

الكلمات الدليلية
(نصائح, مجال, محترف, مصمم, مهمة, الإعلان, تصبح, والدعاية


يتصفح الموضوع حالياً : 1 (0 عضو و 1 زائر)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 01:56 AM.


Powered by vBulletin® Version 3.8.8
Copyright ©2000 - 2017, vBulletin Solutions, Inc. Trans by
new notificatio by 9adq_ala7sas
جميع الحقوق لمدرسة جرافيك مان
اعلانات جرافيك مان
Google