ازاي تبدأ تتعلم جرافيك بشكل صحيح ؟

ازاي تبدأ تتعلم جرافيك بشكل صحيح ؟

ازاي تبقى مصمم جرافيك ازاي تبدأ تتعلم جرافيك بشكل صحيح ؟
ازاي تبقى مصمم جرافيك

ازاي تبدأ تتعلم جرافيكس ؟
المقال دا مهم جدا وطويل جدا وفيه كمية معلومات كبيرة …. لو مش فاضي ممكن تحطه bookmark وترجعله بعدين
-هنتكلم تحديدا عن جرافيكس الأفلام أو ما يعرف بال VFX
طبعا عرفنا يعني ايه VFX بشكل بسيط جدا واستخداماتها ومجالاتها



-هتكلم في البداية والبداية هتختلف من شخص لشخص والبرامج المستحدمة والكلام دا كله بيعتمد على انت عايز ايه او عايز تتخصص في ايه تحديدا داخل ا لVFX

ممكن ناس كل همها تصميم شخصيات وفي ناس عاوزة انيميشن وفي ناس غاوية تركيب …. الخ
وفي ناس عاوزة تبقا فنان VFX بشكل عام او بمعنى أصح Generalist

المجال فيه برامج كتير جدا وكل برنامج له نقطة تميز ودي نقطة وقعت فيها ومتضرر منها لحد دلوقتي ان في برامج اخترتها كان ممكن اختار احسن منها واوفر من وقتي سنتين كاملين!
-في فرق انك تبقا VFX Artist وانك تبقا شغال في حاجة فرعية من ال VFX
-من وجهة نظري ان ال VFX Artist هو اللي يقدر يبني شوت كامل بكل التقنيات اللي فيه يعني
اقصد ببناء شوت كامل يعني انت هتستلم فيديو تشتغل عليه
ف انت هتعمل الMatchmoving
وتعمل شغل ال CGI من الموديلنج للobjects و Rigging و Animation و Render
وبعد ما تخلص دا كله ت Composite *تركب* الكلام دا كله على الفيديو المتصور وتعمل تعديلات في الفيديو لو هتمسح أو هتضيف حاجة وتصحح الألوان وتخرج الشوت النهائي



كدا انت قدرت تبني شغلك بالكامل وتعمل VFX من البداية للنهاية عكس ما تبقا بتعرف موديلنج بس او أنيميشن بس … ف مش كل واحد شغال 3D ينفع يتقال عليه VFX Artist

كذلك في المستقبل في حالة الشغل في تيم أو شركة هتبقا مطالب بتخصص واحد بس من اللي فاتو الا لو في حالة انك Generalist ولكن دا مش معناه انك هتتعلم فرع واحد
انت هتبقا مطالب انك تبقا ملم بالكلام اللي فات دا كله وبعد كدا هم هيوجهوك للقسم اللي يشوفو انك مناسب فيه أو لو كانت الوظيفة متطلبة تخصص معين كدا تمام

نخش في البداية
أنا بفضل إن أي حد مالوش علاقة بالمجال انه يبدأ بجزء ال Compositing عشان بنسبة كبير جدا مألوف للكل وسهل جدا وغير كدا مشابه بشكل كبير لشغل الايديت بتاع الفوتوشوب ف محدش هيلاقي فيه صعوبة

عندنا برامج ايه لل Compositing ؟
1- After Effects
2- Nuke
3- Flame
4- Fusion
5- Smoke

هتبدأ ب After Effects مش عشان حاجة لكن لسبب واحد انه اسهلهم لكن هو أضعفهم كمستوى الا في بعض الحاجات ونظام شغله حاجة اسمها Layer Based Compositing يعني انت شغال بتحط Layers تحت بعض
دا غير انك لما تبدأ بيه وتفهم من البداية يعني ايه Compositing هيسهل عليك جدا انك تنقل للبرامج التانية
وبعد ما تخلصه هتفكر في واحد من التانيين بالنسبالي Nuke عشان هو أحسن برنامج في العالم في المجال دا دا غير انه ال Compositor الأشهر تحديدا في هوليوود والأماكن النضيفة وشغله في مصر قليل جدا يعني عشان كله هنا معتمد على After Effects
وNuke يفرق عن After Effects في طريقة الشغل هناك كانت لايرز تحت بعض
لكن في Nuke مثلا بتبقا حاجة اسمها nodes او عقد انت بتوصل حاجات ببعض بترتيب معين عشان توصل لنتيجة معينة هو هو نفس الشغل بس مميزاتها في حاجات كتير لو شغال على بروجيكت تقيل او شوت فيها elements كتير ف بيبقا عندك مساحة لانهائية توصل فيها الnodes ببعضها

بيميز After Effects انه اقوى في الحاجات اللي فيها موشن جرافيكس يعني زي شغل الهولوجرام مثلا اللي فيها ارقام وتيكست وحاجات مش متاحة في الNuke بنفس الراحة والتحكم
دا غير انه الخيار الامثل في حين شغال في حاجة خفيفة عشان كدا اللي حابب يبدأ يبدأ بيه عشان مش هيبقا مطالب في البداية انه يصمم شوتات تقيلة ومعقدة

الNuke افضل بلا منازع لما تعمل بروجيكت تقيل ومعقد ومليان حاجات 3D وتركيب وغيره

بالنسبة لأفتر افيكتس احسن مصدر تدرسه منه هو موقع
Videocopilot
لصاحبه اندرو كريمر اللي في ناس قالت عنه God Of After Effects
دا أحسن شخص بلا منازع بيشرح البرنامج دا من الصفر لأعلى المستويات
هتلاقي في الموقع Basic Training دول 10 دروس تحفظهم زي اسمك لو وقعت منهم اداة معينة او تكنيك معين هتتعب جدا قدام
بعد كدا في حوالي 160 درس بقا تدوس فيهم براحتك بس اهم حاجة اول 10
لو اشتغلت عالموقع دا بضمير هتحترف البرنامج بدون الحاجة لسورس تاني تدرس منه
………………………………….
الجزء التاني الأعظم والأصعب والأمتع وهو جزء ال3D اللي هو الأساس والشغل التقيل كله يعتبر يعني
ان يبقا عندك عالم خاص بيك تبقا انت المتحكم في كل كبيرة وصغيرة فيه انك تعمل اي حاجة نفسك فيها
المسار الطبيعي لدراسة ال 3D هوكالتالي
1- modeling
2- texturing
3- rigging
4- animation
5- dynamics
6- lighting and render
دي تخصصات ال 3D وكل واحد منهم وظيفة لوحدها
انت هتبدأ بالمسار اللي فات دا هتشوف الانترودكشن والمستويات الاولى لكل واحد منهم وبعد ما تعدي على كله هتقرر انت هتكمل في ايه منهم لازم يبقا في واحد انت متميز فيه جدا ومتقنه لأقصى درجة ولو هتعمل كدا مع كله يبقا دا في مصلحتك بس انت ووقتك

في برامج 3D زي
Maya – 3D Max – Cinema 4D – Houdini – Blender – XSI
كل برنامج بيعمل اللي بيعمله التاني لكن كل برنامج متميز جدا في حاجة
لو أنيميشن يبقا Maya
لو موديلنج يبقا 3D Max
لو موشن جرافيكس Cinema 4D
لو داينامكس Houdini وهوديني بالمناسبة هو أول برنامج عالعالم في المجال دا وأكتر برنامج مطلوب برة دلوقتي خصوصا في وظيفة ال TD اللي هو بتاع الداينامكس يعني اختصار ل Technical Director

ابدأ بمين فيهم ؟
عن نفسي في حركة كويسة جدا لو اتبعتها في المجال دا هتعدي جامد وهي انك تدرس الحاجة ك كونسبت مش كا tool يعني انا هدرس موديلنج كمفاهيم الموديلنج
يعني عارف يعني ايه Extrude او Bridge مثلا واعرف ازاي تطبقها في برنامج معين زي C4D
ف انت لو عارف الكونسبت نفسه هتطبقه في أي برنامج تاني بسهولة بمجرد ما تعرف مكان الاداة في البرنامج التاني
عكس م الناس بتقولك ان البرامج غير بعض او انك بتعمل حاجة مختلفة
“البرامج أدوات تؤدي نفس الغرض بطرق مختلفة” كإنك بتحل مسألة رياضة بطريقة تانية مثلا بس الحلين يوصلوك

أنا بنصح انك تبدأ ب مايا أو C4D
أو C4D وبعدين مايا المهم انك هتتعلم الشغل على برنامج وبعدها سهل تنقل لأي برنامج تاني
ف C4D كويس جدا لحد مبتدئ عشان الانترفيس لذيذة كدا ومش معقد وهتفتح نفسك وسهل وسلس في الموديلنج تحديدا يعني
أنا اتعلمت مايا وهوديني ولسة في حاجات بعملها ب C4D عشان سهولته وعشان كويس جدا في رسم ال Textures وكمان في شغل الموشن زي شغل الهولوجرام هيخدمك جامد كمان في تصميم اللوجوهات وهكذا ولو انها مش تركيزنا عليها

اكتر البرامج المستخدمة في العالم هو المايا وفي مصر السوق متجه بشكل كبير للماكس ف شوف انت هدفك السوق هنا ولا برة
ومحدش يحاول يخش عالهوديني وهو معندوش خبرة سابقة بال3D

أحسن مكان تدرس منه ال 3D كبداية هو موقع Digital Tutors
هتلاقيهم مقسمين كل برنامج لمستويات ومجموعة دروس وانا كاتب الترتيب فوق هتبدأ بالموديلنج وهكذا
وهتلاقو عليه دروس ل After Effects للي حابب يزود وكمان اللي حابب يبدأ Nuke من هناك برضه
هو موسوعة شاملة لأي حاجة خاصة بالجرافيكس حتى فوتوشوب واليستريتور
…………………….
ازاي نجيب الكورسات ؟ هحط الطريقة في اخر البوست
ودي مش هتلاقي أي حد ممكن يقولهالكم بالمناسبة
…………………….
شوية نصايح كدا
-ماتعديش من درس وانت ما طبقتش عليه عشان من غير تطبيق انت ما عملتش حاجة
-ماتعملش تطبيق من غير ما تفرجه لناس عشان تاخد النقد والاراء وتستفيد من خبرات غيرك
-يستحسن ما يكونش اللي هتاخد رأيهم عرب عشان نقدهم بيبقا ناتج عن نفسنة وحقد وهتلاقي عقد نقص بتظهر بنت كلب يعني *الا من رحم ربي* ويستحسن ما تحتكش بعرب خالص لا في شغل ولا في اراء ولا نصايح
أبسط مثال ان الغالبية اللي احتكيت بيها ما بيحبش يتكلم عن مصادره للكورسات ومحدش هيحاول يدلك على بداية الطريق ويديك المعلومة كاملة يعني
عندك جروبات الاجانب فيها مئات الالاف اكتب في سيرش الفيسبوك اسم البرنامج بس وهات الجروبات هتلاقي الاف وفي اخر البوست هتلاقي شويه جروبات برضه
-ماتحاولش تشتت نفسك بدروس اليوتيوب غير بعد ما تتقن الأساسيات عشان دروس يوتيوب مش كلها نفس المستوى ف متلاقيش نفسك بتتفرج على حاجة مش في مستواك وانت لسة مخلصتش اللي انت فيه يعني خلص الكورسات الاول بعد كدا اتعلم تقنيات مختلفة
-ماتديش نفسك اللقب وانت ما عندكش Portfolio أو Showreel
-الShowreel دا فيديو مجمع احسن اعمالك مايزيدش عن دقيقتين واربعين ثانية وكل ماكان اخف وفيه شغل انضف كل ماكان احسن خصوصا كبداية ودا الفيديو اللي بتقدمه للعميل او الشركة اللي هتشتغل لحسابه بالمناسبة يعني دا بيعبر عنك
-خد الامر على محمل الجد الموضوع مش صعب ولا مستحيل بس الموضوع محتاج تجربة كتير وتيستات اكتر
-ماتحاولش تحط في الShowreel نتايج التدريب عشان كله بيبقا عارف ان انت جايب الكلام دا من كورس … ف تحاول انك تفهم المبدأ وتقلده لطريقتك وتبدع وتجود عليه مش مجرد انك بتنحت الحاجة زي ماهي
-مافيش اي داعي للاستعجال انت مش هتظبط من اسبوع او شهر او حتى سنة
-وصولك لمستوى محترم بيعتمد على اجتهادك في المقام الاول والاخير واستيعابك وسرعة فهمك يعني محدش يقلق انه اتاخر او اخد وقت ومتحاولش تشوف دروس كتر من طاقتك عشان هتزهق ومش هتحصل حاجة هتلاقي عندك معلومات كتير مش عارف تستخدمها ف واحدة واحدة كدا وبالهداوة وانت اللي هتحدد الكم اللي تدرسه يوميا او اسبوعيا
-الموضوع ماينفعش يتركن يعني مايعديش عليك شهر وانت ما اشتغلتش عشان هتنسى ف اللي بيدرس يحاول يوفق بين الاتنين وخد الامر على محمل الجد عشان دي دراسة برضه ولو ظبطت نفسك فيها مش هتحتاج دراستك في حاجة
-مش شرط يبقا معاك شهادة في الكلام دا عشان تشتغل شغلك وشطارتك اللي هتحدد الكلام دا

منشن وشير وخلي كل شخص تعرفه يستفيد يمكن تساعده يغير حياته وفكره
طريقه الكورسات
——————
الكورسات متوفرة في موقع CGPeers
ودا في كل ماتتمناه ولا تتمناه خاص بالمجال مش هتلاقي الكورسات والبرامج دي غير هنا يعني
والتسجيل في الموقع بيفتح يوم 1 ويوم 15 من كل شهر ولازم تعمل Seed ولو لمساحة بسيطة عشان الاكاونت ممكن يتمسح لو خامل
————————————————————————————–
دول افضل الجروبات الموجوده
———————————-
https://www.facebook.com/groups/CGtopia/
https://www.facebook.com/groups/CGrevolution/
https://www.facebook.com/groups/ArabHoudiniForums/
https://www.facebook.com/groups/1616207588656538/
https://www.facebook.com/groups/5Dstudio/
https://www.facebook.com/groups/arab4d.net/
https://www.facebook.com/groups/photorealistic/
https://www.facebook.com/groups/Cinema4Dgfx/
https://www.facebook.com/groups/103812233380/
https://www.facebook.com/groups/103812233380/
———————————————————————————————-
منقول طبعا للأستاذ الفاضل Roba’a Eltobgy وبشكره بشكل شخصي علي مجهوده العظيم وافادته اللي قدمها للناس
Jester-co

 

اترك تعليقاً