العلاقات عبر السوشيال ميديا و مخاطرها على المجتمع

العلاقات و الحب عبر السوشيال ميديا و مخاطرها على المجتمع والاسره

social media relationship





 

العلاقات عبر وسائل التواصل الاجتماعي 1 العلاقات عبر السوشيال ميديا و مخاطرها على المجتمع
العلاقات عبر وسائل التواصل الاجتماعي

 

كتير بنات وولاد دخلوا في علاقات عن طريق السوشيال ميديا.. ويمكن دلوقتى أصبح الوسط الأسهل والأنسب للتعارف بسبب الإتاحه طوول الوقت وتعدد فرص الاختيار والأهم إنه جابلك العالم بين إيديك وخلاه بقى رهن ضغطة زرار.
أنا لا مع ولا ضد الفكرة لكن ضد إستغلالها من أي حد من الطرفين وإستسهالها وتزييف حقائق مهمة عن نفسنا لمجرد الفوز في معركة لو فشلت فكل أطرافها بيخسروا.
قبل ما تبتدي تتورط في العلاقة الإليكترونية وتنجرف ورا شلال المشاعر بدون تفكير
اقعد مع نفسك وإسألها كام سؤال مهمين جداً





يا ترى أنا أقدر أوصل لشريكي في العلاقة في أي وقت أحتاجه بدون شروط..

العلاقات عبر وسائل التواصل الاجتماعي 1 العلاقات عبر السوشيال ميديا و مخاطرها على المجتمع
العلاقات عبر وسائل التواصل الاجتماعي

 

طب يا ترى بنشوف بعض لايف ونسمع صوت بعض ونشوف ريأكشنات بعض ولا كل اللي ببننا شوية حروف وإيموچي بتعبر بدل مننا..

طب لو إختفى لسبب ما. هل هعرف أوصله بسهولة ولا كل اللي متاح ليا هو ما تحت السماء الزرقاء أو الحجرة الخضراء فقط. هي دي كل حدودي اللي مسمحولي أتحرك فيها..هل اعرف مكان بيته.. شغلة.. حد من صحابة الحقيقيين.. بعرف اخباره حصري ولا بعرفها من البوستات
وهكذا

يا ترى لو حصل مشكلة أو خلاف هنقدر نتقابل ونتفاهم ولا الموضوع هايقلب بفضايح وسكرينات وشرشحات وينتهي ببلوكات.. هل فعلاً علاقتكم تحت رحمة البلوك في أي لحظة اعملك بلوك او اقفل الاكاونت فإنت كده بخ بالسلامة..

يا ترى الطرف التاني بيحترم وجودي وبيعترف إن ليا حقوق فبيراعي مشاعري وعامل حدود بينه وبين الأخرين بنفس القدر اللي هايبقى موجود في الحياة الطبيعية ولا مواقع التواصل خلت في مساحه من الحميمية غير مبرره ليك كشريك محتمل للحياة..

الريأكت اللي شريك العلاقة بيحاول يفهمك إنه حاجه عادية جداً. فأحب أفاجئك إنه لا مش عادي بدليل إنتم شخصياً اغلب تعببراتكم لبعض مجرد ريأكت يعني القلب ليه معنى والبوسة ليها معنى وووو….
إلخ..

 

العلاقات عبر وسائل التواصل الاجتماعي 2 العلاقات عبر السوشيال ميديا و مخاطرها على المجتمع
العلاقات عبر وسائل التواصل الاجتماعي

بمعنى لو انت/ي مرتبط/ة فأكيد لو مثلاً شوفت زميلك أو زميلتك في الشغل نازل النهارده شيك وشكله حلو فمش طبيعي ابداً إنك لما تشوفه تقوله حبيت شكلك او حبيت لبسك أو لو مثلاً هو جاملك بكلمة لطيفة فأنت أكيد مش هتديله بوسة يعني.. ليه بقى نقلب الأية في مواقع التواصل ونقول دي مجرد ريأكت وناس ما اعرفهاش حقيقي ما تنساش انكم ابتديتوا كدا مجرد ريأكت لحد ما تعرفوش فبلاش نمسخ كل حاجه وتبقى متاحه اووي تحت مسمى ده مجرد سمايل فيس..

لما تتكلم/ي برايڤت عادي مع أي حد انت كده مش لطيف وأوبن مايند وبلا بلا بلا… لا خالص صدقني ماهو انت مش ماشي في شغلك اي واحد ولا واحده عاوز ترغي معاه بتروح واخده في أوضة لوحديكم وهات يا رغي.. ده بالنسبالي مش منطق وشيئ مرفوض شكلاً وموضوعاً..

العلاقة الاليكترونية لو جد فهي اصعب مليون مره من اللايف. فكرة إنك توصل للطرف التاني إنك إنسان حقيقي جداً ومش مدعي ولا ممثل شاطر بحيث لما يقابلك ما يحسش بغربة. وسمعنا كتير عن ناس فضلوا مع بعض شهور ولما اتقابلوا انهوا العلاقة دي وغالبا السبب بيكون ما حسيتش انه نفس الشخص لاا ده حد مختلف مش ده اللي حبيته..

فرجاءً يعني لو مش قدها وقد التزامها الاكتر من العادي فبلاش ترهق قلبك وتستنزف مشاعرك انت والشريك لمجرد التجربة او انك زهقان او اياً كانت اسبابك وما تنساش النوع ده من العلاقات المحرك الأساسي ليه هو الخيال فياريت ما تشطحش بخيالك لبعيد عشان وانت راجع لوحدك هتتبهدل اووي..

نقطة ومن أول السطر.

 

اترك تعليقاً