مسلسل القاهره كابول في رمضان

القاهرة كابول مسلسل تشويق، إثارة مصري منتظر عرضه في 12 أبريل 2021. المسلسل من إخراج حسام علي، ومن بطولة طارق لطفي، خالد الصاوي.

مسلسلات رمضان  2021
Cairo Kabul series
أكتر حاجة لفتتني في البوستر ده هي علامة التوحيد  اللي الأراجوز ده عاملها بالسبابة، هيحولوها لإشارة ماسخة زي ما حولوا كلمة اللّٰه المُستعان في مُسلسل الاختيار للاستهزاء وأي حد يقولها يبقى إرهابي، من وقتها وأنا حزينة ومقهورة كل شوية افتح التليفون وأجيب على الصورة وأبص عليها، أخويا شافني قال لي هتعملي إيه؟ اقفلي التليفون وذاكري أحسن، قُلت إنّا للّٰه وإنا إليه راجعون.





ده غير العك اللي هيبقى مالي المُسلسل عشان يبينوا أي حد مُلتزم بدينه يبقى مثال سيئ وونصاب وحرامي وإرهابي وعايش على دم الناس.

احنا خلاص وصلنا للمرحلة اللي الواحد يتقهر فيها من الحزن وميقدرش يتكلم، إنا للّٰه وإنا إليه راجعون.

 



مسلسل القاهره كابول مسلسل القاهره كابول في رمضان
مسلسل القاهره كابول

 

استنادا لطبيعة المسلسلات اللي فيها جانب ديني اخر 50 سنة تقدر تتنبأ بأحداث المسلسل ده من البوستر من غير ما تتفرج عليه.

طارق لطفي هيطلع بدور الجها.دي اللي عايز يقتل في الناس كلها بدون سبب كدة وخلاص .. وهايكون طبيعة يومه بيصلي ال5 فروض في الجامع وبيبرَّق وبيحرَّم الاغاني والعري وكدة .. بالتالي هايخلق عند المشاهد صورة ذهنية بأن القاتل ده شخص بيصلي ال5 فروض وبدقن وجلبية وسبحة وبيأمر بالمعروف وينهي عن المنكر .. فالمشاهد الجاهل (وما أكثر الجهلة) يكره الحِفاظ على الصلاة ويكره تربية اللحية وكل مَن له لحية ويكره كل من يأمر بالمعروف وينهى عن المنكر ويحب الأغاني واللي بيغنوها ويرقصوا عليها ..

نبيل الحلفاوي بقى هيطلع المسلم الكيوت اللي بيصلي بس مبيعملش اي حاجة تخص الدين غير الصلاة وده طبعا هيبقي النموذج المثالي للمسلم علشان لو في حد مكرهش الإسلام بسبب طارق لطفي علي الاقل يبقي زي نبيل الحلفاوي .. يكون دينه في الجامع بس .. لا بيأمر بالمعروف ولا ببنهى عن المنكر ولا حرام وحلال ولا الدين لله والوطن لله ولا اي حاجة من دي.

حنان مطاوع طبعا هتفضل ضعيفة ومكسورة وعينيها مدمعة ونفسيتها تعبانة طول المسلسل لحد ما تقلع الحجاب .. هوبا بقى ساعتها هاتاخد سوبر باور وتبقى المرأة المثقفة المتحررة وهتكون نفسيتها مرتاحة وسعيدة والضحكة على وشها آاااد كدهو .. وبعد ما كانت بتصلي ومحجبة ومكشرة .. لما تسيب الصلاة وتكشف شعرها نفسيتها هترتاح كأن الحمل علي المرأة هو الدين ومناسكه .. علشان البت عبير سبانخ اللي حزينة في حياتها لأن الكراش بتاعها مبيردش عليها تتخيل إن سبب خنقتها هو الطرحة والدين …

فتحي عبد الوهاب وخالد الصاوي طبعا هيبقوا نموذج الشخص الذكي الواعي المتنور الكرييتف البعيد عن الدين لكن تحت مسمي مسلم ..

علشان المسلسل يبقي ال5 أشخاص الأساسين بتوعه عبارة عن نماذج مشوهة للمسلم ويتفرج عليها أطفالنا وأهل بيتنا ويتأثروا بأفكاره وبعد ١٠ سنين لما يزيد النفور من الدين نقعد نقول يا ترى ايه سبب بُعد الناس والشباب عن الدين ؟؟!!!

القصة دي مش بالضروري تكون قصة المسلسل لكن هي قصة مسلسل علي الأقل بيتعمل كل سنة ويكون بيتعرض في أوقات ذروة المشاهدات يشوفه كل الناس

فبدل ما شهر رمضان يكون زاد للعبادة لسنة كاملة بيكون شهر لكسب الذنوب وخسران درجات في الجنة من مشاهد التبرج .. وشهر تشويه للنفس والعقل وإنبات المرض الناتج عن تسليم عقولنا للمسلسلات والأفلام .. وهو مرض وصفه ربنا سبحان وتعالي في أية ٤٥ من سورة الزمر :
{ وَإِذَا ذُكِرَ اللَّهُ وَحْدَهُ اشْمَأَزَّتْ قُلُوبُ الَّذِينَ لَا يُؤْمِنُونَ بِالْآخِرَةِ ۖ وَإِذَا ذُكِرَ الَّذِينَ مِن دُونِهِ إِذَا هُمْ يَسْتَبْشِرُون }

وقف مشاهدة السينما والتليفزيون خاصة في شهر رمضان قبل ما يصيبك المرض ده إنت وأهل بيتك .
تركك للمسلسلات والأفلام دي شغالة في بيتك هاتتسأل عليه يوم القيامة
النبي ﷺ قال : ((كلكم راعٍ وكلكم مسؤولٌ عن رعيته))

اترك تعليقاً