كيف يتم تحليل المخدرات في مصر

الناس اللي عاوزه تفهم ازاي بيتعمل تحليل المخدرات في مصر علشان الموظفين اللي بيحششوا يحترموا نفسهم شويه

Drug testing in Egypt



تحليل المخدرات في مصر كيف يتم تحليل المخدرات في مصر
تحليل المخدرات في مصر

 

البداية كانت مع خبر قديم في أكتوبر 2017 نشرته جريدة النبأ الوطنى على لسان المستشار الدكتور محمد جميل، رئيس الجهاز المركزي لـ«التنظيم والإدارة»،عن البدء في اتخاذ خطوات جادة وعملية لتطبيق نص المادة 177 من اللائحة التنفيذية لـ«قانون الخدمة المدنية»،

من خلال إجراء التحاليل الطبية الخاصة بكشف متعاطي ومدمني المخدرات من موظفي الجهاز الإداري للدولة. و بعيد عن كلام الجريدة الى بتقول أن تطبيق موضوع الكشف عن المخدرات هو بالإتفاق مع صندوق النقد الدولى الخاص بـ«الإصلاح الاقتصادي»،



وكانت أولى خطوات خطة الإصلاح، الاستغناء عن 3.5 مليون موظف بـ«العمل الإداري»، وهو الأمر الذي سبق وأعلن عنه الرئيس عبد الفتاح السيسي بحسب كلام الجريدة على لسان كاتب الخبر أحمد بركة . إحنا طبعا ميهمناش أبعاد الموضوع السياسى و لا حتى لو أتنفذ فعليا هيتصرف عليه منين..

خاصة و إن شريط تحليل المخدرات الواحد كان بيتباع في راديو شاك من 10 سنين ب 70 جنيه..و معرفش موجود لسه عندهم و لا لا و معرفش سعره كام دلوقتى..لكن اللى أعرفه بعد ما تابعت مولد سيدى المحشش و الأوكازيون اللى عملاه المستشفيات الخاصة اللى بتقول على نفسها بتعالج الإدمان من إن تحليل مخدر واحد هيكلف 90 جنيه و لو هتحلل لوكشة واحدة لكل المخدرات هتدفع 900 جنيه..

ده هيدينا فكرة واضحة عن تكلفة تحليل المخدرات للمحروسة اكيد هيدخل في مليارات..علشان كده المتوقع ان التحليل هيكون عشوائى و مش كل الناس..و اللى أكد الكلام ده نفس الصحفى في نفس الجريدة و إن الوزارات اللى تم أختيارها لتطبيق الكشف العشوائى عن المخدرات هيا الأوقاف، التربية والتعليم، الصحة، التضامن الاجتماعي، القوى العاملة، الكهرباء، الإسكان، التعليم العالى، والمالية، بجانب موظفي جميع المحافظات، والهيئات المستقلة.

مرة تانية بعيد عن الهرى ده سواء الإسقاطات السياسية أو التبعات الاقتصادية للموضوع اللى متهمناش من قريب او بعيد ، رغم أهمية إتخاذ قرار زى ده و اللى أنا شايف بغض النظر عن السلبيات اللى هتشوبه..بس لو أتنفذ صح هيبقى ضربة معلم و هيرحمنا من غول الإدمان اللى تفشى فى مصر، اللى وصل لنسبة 10% من سكان المحروسة بيضربو ، بحسب صندوق مكافحة الإدمان في اخر أكتوبر 2018 .

انا عاوز أتناول الموضوع من منظور علمى بحت. بداية مفيش حاجة أسمها كشف عن المخدرات لأن عندنا مخدرات و منشطات…طيب إيه أنواع المخدرات اللى عندنا في مصر المحروسة؟

1- الحشيش: طبعا ناس كتير متعرفش أن الحشيش كان جزء من الثقافة المصرية…لدرجة إن نابليون بونابرت نقل الحشيش لأوروبا من مصر و من ساعتها أوروبا بتحشش…طبعا الكلام هنا عن الحشيش الراتنجى وده مبقاش يطبخ في مصر بعد وزير الداخلية اللواء أحمد رشدى طربق الباطنية على اللى فيها سنة 1985 و ده كان سبب رئيس في إنه إتشال لأنه هدد مافيا تجارة المخدرات في مصر و اللى كان على رأسها رتب بالهبل أيام مبارك بحسب مجلة Foreign Policy في عدد أغسطس 2013

و أدى الرابط

 

Looking for Hashish in Cairo? Talk to the Police

لدرجة إن المجلة قالت بالنص إن بعد إقالة أحمد رشدى من وزارة الداخلية تجار المخدرات نزلو صنف إنما إيه لوز العنب و سموه”باى باى رشدى”
إحتفالا بإقالة أنزه وزير داخلية عرفته مصر…

المهم: الحشيش اللى في البلد مستورد ونسبة كبيرة منو بيجى عن طريق إسرائيل و ليبيا و السودان، أما أفضل الأنواع ففيه الأفغانى و المغربى ، طيب ده الحشيش اللى بتشوفو بيتقطع طرب في الأفلام  ، و ده طريقة التعاطى إما بالتدخين في سيجارة أو بطريقة الكوباية. او عن طريق الغرقانة…وممكن يتحط على حلويات زى الكيك او التورتة زى بتاعة سى دونى في مسلسل الكبير، و دى بتتباع أصلا عادى في محلات أمستردام .

أمال ايه البانجو ده؟ البانجو سيادتك هو نبات الحشيش كامل مجفف…طب الماريجوانا..دى أوراق النبات مع شوية سيقان…,ودول بيدخنو على هيئة جوان او سامسون أو عرنوس (اللى مش عارف دول ايه يسال)

أيا كان النوع أو طريقة التعاطى لازم تعرف إن الحشيش بيفضل في البول بعد أخر تعاطى لمدة 7 أيام لو اللى بيتعاطى لسه جديد أما المتمرس ممكن يفضل في البول لمدة 3 شهور…علشان كده أي تحليل مفاجا هيخليه يلبس…لكن لو عارف ان فيه تحليل ممكن بقى يتحايل اما يشرب كميات ضخمة من المية او ياخد مدرات بول او مادة حمضية زى الخل تسرع من التخلص من المادة الفعالة,>>> او اضيف مية للبول.

بالمناسبة على e-bay ممكن تشترى synthetic urine بول صناعى بيتباع عشان بيبدلوه برة مع عينة البول..بس خد بالك ياحلو…عينة البول الطبيبعية درجة حرارتها مابين 32-38 درجة يعنى لو خففت عينة البول من الحنفية او بدلتها مع عينة شاريها لو انت واد مريش و بتدفع بالدولار هتضطر تدكنها في هدومك عشان تفضل دافية..
.طب اعرف منين ان عينة البول مخففة؟ بسيطة تحسب ال specific gravity لو اقل من 1.003 او نحلل creatinine في البول لو اقل من 20mg/dL يبقى برضو مخفف.. لكن تفتكر اللى بيحللو عارفين او مؤهلين او معاهم التقنية اللازمة اورفاهية الوقت لعمل الكلام ده…أشك..

فيه مشكلة تانية مش بس فيه ناس هتعدى من اختبار الحشيش لا…فيه ناس هتلبس في الخيش…ليه؟
علشان لو سيادتك بتاخد أدوية زى Ibuprofen, ketoprofen, naproxen لتسكين الألم الإختبار هيدى False Positive طب لو سيادتك كنت قاعد قعدة انس بس مش بتحشش..و اتمسكت في لجنة اخر الليل انت و اصحابك…التحليل هيدى Positive Test عشان سيادتك مدخن سلبى… و أبقى اثبتلهم بقى انك كنت بترصص الحجر مش بتشرب

اترك تعليقاً