جرافيك مان تحميل ملحقات تصميم و تعليم الجرافيك ، صور و اخبار حول العالم
لو اول مره هتسافر سيوه يبقي انت يلزمك النصايح دي first time in Siwa
اين تقع سيوه
سيوة هي مدينة وواحة مصرية في الصحراء الغربية، تبعد حوالي 300 كم عن ساحل البحر المتوسط إلى الجنوب الغربي من مرسى مطروح ، وتتبع محافظة مطروح إدارياً.
اهم النصائح
-اعمل حسابك انك هتسافر طريق طوييييل يعني مخده الرقبه تبقي شئ اساسي معاك
-مفيش تفتيش كتير علي طريق سيوه يدوب بيشوفو البطايق مره او اتنين ده لو اتشافت
-الصن بلوك للبنات و نضاره الشمس و الشابو دول مهمين جدا عشان المزارات بتبقي الصبح و الصبح بيبقي حر شويه
– بليل بقي الدنيا بتسقع فهتجيب معاك چاكيت او حاجه تقيله
– الناموس و الدبان هناك متربيين ع الغالي يعني الoff و البيرسول و انك تلبس حاجه مغطيه جسمك ده مهم
– اللي بيفرق من نضافه اوتيل للتاني هو اهتمامهم بالرش غير كده مش مهم يعني الديكور و شكل الغرفه حاجات مش مهمه علي قد ماتبقي نضيفه
-اعمل ميزانيه خاصه للبلح و الزيتون و الزيوت و السكراب و ال skin care عشان الطبيعه المنتجات دي طبيعيه هناك
– روح مع شركه سياحه او جروب المهم يبقي معاكم باص خاص عشان هتتبهدل لو روحت مواصلات
و اللي هيقولي هروح بعربيتي يبقي استعوض ربنا في العفشه
-السفاري السفاري السفاري اجمل سفاري ممكن تعملها في حياتك و يكفي اقولك ان سيوه بتنافس الامارات في السفاري الصحراويه
-المردم لازم تجربه و هو الاكل اللي بيستوي تحت الارض و ده مشهور في سيوه جدا و احلي مطعم بيعمله هو علي عليوه
– اطلب يحطولك زيت زيتون علي الاكل بسبب و بدون سبب طعمه جميل اوي
-بلورات الملح طبعا هي اجمل سيڤونير من سيوه غير ان شكلها هيبقي جميل اوي في الاوضه و ممكن تشتريها كهديه لصحابك
-لو عايز تجرب فطار مميز افطر عند مطعم عبده في السوق
-المواصلات هناك عباره عن التروسيكل و العربيه السوزوكي الصغيره (التونايه)
-متفوتش سهره في كامب علي خالد لانك هتعيش الاجواء جدا و هتتبسط و في هناك عين ميه سخنه ممكن تنزلها
-التصوير في سيوه رهيييب بجد هتلاقي صحرا و خضره و ميه و شكل مباني مختلف هيساعدك في التصوير
– اهل سيوه مرحبين بالناس و بيحافظو علي بلدهم و عاداتهم و ياسلام لو عملت حوار مع حد من اهل البلد هتحس قد ايه هما عايشين في سلام نفسي
-بحيرات الملح حذاري تلمس وشك او شعرك او عينك هتتبهدل جدا و لو متعور جامد اعمل حسابك انك هتحس بنار في الميه من الوجع و للعلم دي حاجه مفيده و مطهره للجرح
و اخيرا سيوه من اجمل مدن مصر و اجمل طبيعه ربنا خلقها مش هتصدق الجمال اللي عينك هتشوفه
و تستاهل اننا نزورها
