ليه شركات الدعايه بيفضلوا مصممات الجرافيك البنات؟

الموضوع ده للبنات الجرافيك ديزاينرز بس .. مصممات جرافيك بنات
للمصممات فقط Girls graphic designers

ليه اصحاب شركات الدعايه بيفضلوا مصممات الجرافيك البنات؟

 

 

اخدتي بالك من أن أصحاب الشركات طول الوقت عايزين بنات يشتغلوا مصممات جرافيك!
فكرتي ليه!.

اجيب ولد ليه يسرق تصميماتي والعملاء بتوعي، البنت عندها أمانة اكتر مش هتسرق تصميمات الشركة وكمان هترضي بالفلوس القليلة، مش زي المصمم (الولد) كل شويه هيكون عايز زيادة ف المرتب ومبيكونش ملتزم!
نعم!
انتوا متخيلين اني سمعت الكلام ده فعلا من مدير أحد شركات التصميم !
والله يا فندم اللي عايز يسرق تصميمات مش هيفرق هو ولد ولا بنت
تخيل لما عقلية المدير ده أو (مديرين كتير الصراحة) تكون كده ف التعامل مع المصممات (اللي حرفيا مشغلين وشايلين المكان بجهودهم وشغلهم) مش بمجهوده هو خالص يعني.

 

طيب اعمل ايه؟ وانا لسه مبتدئة :

اولًا: لو معندكيش خبرة، ممكن تبدأي ك internship ودي بتكون انك بتشتغلي زي ما بيقولوا (تحت التمرين) ساعات مجانا او بمقابل بسيط ومن ده بتعملي بورتفوليو قوي ليكي.
أو ممكن تعملي شغل وهمي وتبني بورتفوليو قوي عن طريق مشاريع بيهانس

ثانيًا: خلي عندك وعي بحقوقك زي ما انتي واعية بواجباتك تجاه شغلك، ويا حبذا  لو عرفتي حقوقك دي من أول الشغل، في أول انترفيو
الشركات المحترمة بتوضحلك، المرتب كذا واحنا بنزوده لما يحصل كذا أو بعد فترة قد كده.. تقدري تاخدي اجازة امتى، اختصاص شغلك ايه، المواعيد ايه وهكذا ..
ولو محدش قالك اسألي انتي، عادي جدا، ده حقك انك تعرفي وع أساسه توافقي تكوني جزء من المكان ولا لأ

ثالثًا: لو اي حاجة في الشغل مش عجباكي سبيه، سواء بيئة العمل مش صحية (بمعنى المحطيين بيكي في العمل مش مشجعيين ع الابداع ولا ع اي حاجه مفيدة) أو المرتب قليل ومش بيزيد أو الشغل بيزيد ومفيش تقدير معنوي حتى أو بتقعدي لوقت اضافي ومفيش حافز زيادة.
طالما شغلك بيتطور، يبقى ألف مكان تاني يقدرك (نفسيًا وجسديًا وعقليًا) يتمناكي.
طالبي بحقوقك من فضلك، طالما شغلك حلو وف تطور.