جرافيك مان تحميل ملحقات تصميم و تعليم الجرافيك ، صور و اخبار حول العالم
كيف يخترق واتساب محادثاتك الشخصيه
How does WhatsApp penetrate your personal conversations
يوم 4 يناير غالبا طلعلك تحديث في سياسات whatsapp.
انت غالبا دوست موافق من غير ماتقرا ايه اللي مكتوب وقمت تقلي بطاطس علشان جعان.
بس المهتمين بالخصوصية والامن السيبراني (هو اسمه كده) قلبوا الدنيا لدرجة إن إيلون ماسك كتب تغريدة بيقول فيها استخدموا سيجنال.
– سيجنال ده برنامج محادثات احسن بكتير من whatsapp من ناحية الخصوصية والامان.
ايه اللي حصل وليه التعديل ده قلب الدنيا؟!؟!
قبل ماتتخض احب اقولك ان محادثاتك مشفرة زي ماهي, يعني محدش هيشوف انت بتقول ايه. بس الطبيعي في whatsapp ان ال metadata بتتشاف عادي.
ايه ال metadata دي؟
ممكن تشبها باللوج اللي عندك علي الموبايل دي بيبقي فيها كل حاجة متعلقة بالرسالة اللي انت بعتها ماعدا الرسالة نفسها زي من اللي باعت, باعت لمين, الساعة كام وكده. افتكر الحتة دي كويس هنحتاجها قدام.
بص او بصي اللي شعلل الموضوع ان whatsapp ذكرت في التحديث ده انه ياتوافق عليه يا مش هتخش علي حسابك و هيتحذف حاجة كده زي يالدفع يالحبس.
ماتقول ياعم حدثوا ايه في سياسات الخصوصية بتاعتهم؟
من الاخر كده whatsapp بقت بتجمع معلومات عنك وهتبعتها لفيسبوك وشركائها.
ايه المعلومات دي؟
بص علي الصورة هتلاقي اغلب اللي بيتجمع. واللي هو رقم تليفونك, نوعه, النظام اللي عليه, البطارية, صورة البروفايل, عنوان الجهاز الالكتروني IP, الجروبات اللي انت فيها, الstatus بتاعتك, كيفية الاستخدام لل whatsapp , موقعك الجغرافي وحاجات تانية.
ومش بس كده لو انت بتكلم حساب تجاري والحساب ده قرر رفع الرسائل بتاعته علي فيسبوك, كده فيسبوك هتشوف الرسايل دي. بس انت هيجيلك notification بكده وانت وراحتك بقي.
طب ليه الهيصه دي وطبعا مننساش السؤال العظيم: هي فيسبوك هتسيب الناس كلها وتخترق خصوصيتي انا؟!
بص يابرنس. من الاخر كده فيسبوك عايزة تكسب فلوس.
طب هتكسب ازاي وهي بتديك تطبيق ببلاش؟
ايوا انت صح, الاعلانات. دلوقتي whatsapp يعرف عنك معلومات كتير وبيبعتها لفيسبوك وانستجرام فاهيقدروا يوجهوا ليك اعلانات.
في جزء في السياسة بيقول انهم مش ناويين يعملوا اعلانات علي whatsapp بس لو هنعمل هنقول وده عكس ماكانوا بيقولوا زمان انه مفيش اعلانات. يعني من الاخر إحتمال قريب جدا نشوف اعلانات جوا whatsapp او مايسمي بbanner ads.
دلوقتي انت قدامك خيارين يإما تكمل زي مانت وتفضل تستخدم whatsapp او تشوف بديل.
لو هتفضل مكمل وده بنسبة كبيرة لازم تحاول علي قد ماتقدر انك ماتبعتش اي حاجة مهمة علي whatsapp واحب اقولك ان كتير من الحكومات والمنظمات قرروا عدم إستخدام whatsapp في الشغل.
في اشاعات كده ان فيسبوك عندها backdoors وتقدر تخش علي رسايلك لو اطلب منها كده.
طيب والبديل ياعم؟
عندك telegram و signal
مش هتكلم عن telegram كتير بس هقولك حاجتين اول حاجة ان خصائص الامان والخصوصية فيه مش مفعلة يعني لازم تفعلها بإيدك.
تاني حاجة إن المفوضية الاوربية حطته من المواقع المقرصنة وده بسبب القنوات اللي كان بيتحط عليها افلام ومسلسلات بس الصراحة تيليجرم عامل شغل عالي وبيشلهم كل شوية.
ده لينك الخبر
https://www.ehackingnews.com/2020/12/the-european-commission-added-vkontakte.html
نيجي بقي لsignal.
مبدئيا كده ده signal غير ربحي ويعتبر أأمن برنامج محادثة موجود ويكفي إن whatsapp مستخدمين نفس بروتوكول التشفير بتاعه.
فاكر ال metadata اللي اتكلمنا عليها فوق signal بقي بيشفرها يعني كمان محدش هيعرف انت بتعمل ايه ومميزات تانية كتير زي تدمير الرسائل الذاتي
هدفهم الاول هو الخصوصية.
لما حصلت مظاهرات في امريكا نزلوا خاصية انك تحجب وشوش الناس في الصور علشان محدش يتمسك
عيب سيجنال الوحيد انه مش user-friendly اوي فبعض الخصائص مش هتلقيها او محدودة.
ناس كتير حولت لسيجنال لدرجة عملت delay في الverification process. بس اتحلت خلاص.
الخلاصة:
– تطبيق whatsapp بيجمع معلومات عنك هدفها الربح.
– حاول تققل إستخدامك ليه.
-حاول تستخدم برامج تانية زي signal او telegram.
مصادر بقي:
https://latesthackingnews.com/2021/01/10/facebook-updated-whatsapp-privacy-policy-what-it-means-for-you/
https://threatpost.com/facebooks-mandatory-data-sharing-whatsapp-ire/162828/
الامن السيبراني , امن المعلومات cyber ,security
مصدر الصورة: beebom
