قصه حب لوسي و براد التي ابكت العالم

عن الحب الحقيقي ⁦♥️⁩ ..

شاب في قوات الدفاع الاسترالية اسمه Brad Congerton كان طول عمره بيدور علي الحب، لكن الحياة العسكرية كانت مانعاه لحد ما الصدفة جمعته ببنوتة اسمها Lucy Wieland في الجيش من سبع سنين كانت شغالة في الجيش بردو في الDefence Bank، ونظرة فأبتسامة فسلام فكلام فوعد فلقاء فحب، ونشأت بينهم قصة حب طويلة ارتبطوا فيها علي مدار سنين طوال اتمنوا لو استمرت للأبد.



 

Brad Congerton 1 قصه حب لوسي و براد التي ابكت العالم
Lucy Wieland
Brad Congerton 2 قصه حب لوسي و براد التي ابكت العالم
Brad Congerton
Brad Congerton 3 قصه حب لوسي و براد التي ابكت العالم
Brad Congerton

 

الا ان القدر كان ليه كلمة تانية، عشان في يوم من الايام لوسي يغم عليها وتروح المستشفى، وبعد كدة تروح وتسكت، براد يلاقي لوسي بتعيط، وبعد ما يتحايل عليها عشان تحكي، ووقت العياط كدة مقدرتش تمسك نفسها وقالتله الحقيقة، ان الدكتور اكتشف ان عندها سرطان في المبيض.



 

Brad Congerton 4 قصه حب لوسي و براد التي ابكت العالم
Lucy Wieland

 

براد اخد الكلام ومعملش اي رد فعل، مقدرش بصراحة انه يستحمل لكنه استحمل وسابها جواه، وقرر تنه ميحسسهاش بأي فرق وانها لازم تتعالج عشان بيحبها، عشان مش هيعرف يعيش من غيرها .

Brad Congerton 5 قصه حب لوسي و براد التي ابكت العالم
Lucy Wieland

اقنعها انها تتعالج وهيا مكانتش موافقة في البداية عشان تكاليف العلاج، لكنه اصر، وكان بيوديها المستشفى بنفسه ويرجعها، لما كان بيروح معاها المستشفى، كانت دايما بترفض انه يكون معاها جوا العيادة عشان مبتحبش انه يشوفها بالشكل ده، فا بيستناهغ برة ويروحها، وفي البيت كان هوا اللي بيعمل كل حاجة، بيعمل الاكل وينضف البيت، يشيلها ويحطها عالسرير، يسهر جمبها عشان لو احتاجت تروح الحمام لان المرض خلاها بتمشي بالعافية بعكاز، يديها الدوا عشان متنساهوش، وسخر نفسه لخدمتها وهيا كانت كل يوم تقوله بحبك .

Brad Congerton 6 قصه حب لوسي و براد التي ابكت العالم
Lucy Wieland

 

مع ازدياد فترة العلاج فلوس براد خلصت، واضطر يسحب من مدخراته في البنك عشان يديها لحبيبته تسد في المستشفى، لحد ما مدخراته هيا كمان خلصت، وبقا محتاس مش عارف يعمل ايه، ومكنش قدامه غير انه يقدم علي قرض ب١٢ الف دولار، ولما خلصوا لان العلاج كان غالي فعلا، قدم علي ١٠ الاف تانيين، وبردو للاسف مع الوقت خلصوا في العلاج .

Brad Congerton 7 قصه حب لوسي و براد التي ابكت العالم
Lucy Wieland

 

الناس كلها كانت متابعة حالتهم وصورهم علي انستجرام، ومكانوش قادرين يسكتوا، فالحي اللي كانوا ساكنين فيه لموا فلوس من بعض وادوهالهم، وزمايله في الجيش قرروا يبيعوا كوكيز عشان يجمعولهم مبلغ لعلاج لوسي، واخر امل ليه عشان حبيبته كان انه عملها صفحة علي Gofundme اللي هوا موقع للتبرعات وعمل عليه فيديو يشرح حالتها وانها مش هتعرف تتعالج غير في المانيا، والناس مكدبتش خبر قصاد الصور والقصة اللي تقطع القلب وهيا بتفقد شعرها ومبتفارقش المستشفى، وبدأوا يساعدوا لحد ما وصل مجموع التبرع ل٥٥ الف دولار، واتفتح امل جديد قدام الحبيبين.

قدر في النهاية انه يجمع المبلغ، حرم نفسه من كل حاجة لدرجة انهم كانوا بيتعشوا في بيت ابوه كل يوم عشان يوفروا تمن الاكل ويحطوه عالفلوس بتاعت سفرها، عشان ينقذ حياتها بأسرع وقت، ويرجعوا لخطتهم القديمة في الزواج والانجاب.

بعد كام يوم صحي من نومه زي عادته جمبها، باسها، قالتله بحبك، اتطمن عليها ونزل يشوف حوار المانيا ده وهيعملوا فيه ايه، وهوا برة افتكر حاجة فا اتصل بيها، الغريبة انها مكانتش بترد، مرة واتنين وتلاتة مبتردش، قلبه اترض جوا صدره وانتفض، يا رب اللي في باله ميكونش حصل، لا اكيد نايمة او حاجة ..

ساب اللي في ايده وجري علي البيت بسرعة، وطول الطريق عمال يتصل مبتردش، لحد ما وصل البيت، زق الباب عشان مفيش وقت يفتح وجري لحد اوضتها وهوا قلبه علي شفا انه يقف، فتح الباب لكنه للاسف كان جه متأخر ..

لا مماتش اهدى، دا ملقاهاش اصلا لا هيا ولا هدومها ولا ال٥٥ الف دولار ..

نعم؟ دي راحت فين دي؟ فضل يدور هنا وهناك ويتصل ويدور ملقاهاش، راح المستشفى يسأل عليها ودخل العيادة اللي كان مبيدخلهاش دي، معلش مدام لوسي اللي كانت بتاخد كيماوي هنا جت؟ فالدكتور بصله وضحك كدة وقاله “كيماوي؟ كيماوي مين يا حج دي كانت بتقعد معانا نهزر ونضحك عادي، بتيجي تكشف وتمشي” ، يعني ايه الكلام ده؟ هيا مش عندها كانسر في المبيض؟ قاله لا يا بقف دي بتشتغلك،

طب وتقرير المستشفى؟ بص الدكتور عليه كدة وضحك تاني وقاله مزور يا عبيط يا اهبل، مزوراه مفيش الكلام ده، طب والادوية؟ راح البيت عشان يجيب الادوية وبصوا فيها، طلعت عبارة عن علب لادوية السرطان، لكن فيها فيتامينات ودوا لالتهاب المسالك البولية، وزيت حشيش، كانت بتجيب حشيش وتشربه وتقولك اصلي مفرهضة من الكيماوي.

لوسي بتشتغله بقالها سنين، عشان تلم فلوس وتأمن مستقبلها وتهرب، كانت مخططة لكل ده ولما جت اللحظة المناسبة سابته ومشيت، قعدت في مدينة تانية عادي بالفلوس، ومين بقا اللي لبس قضية نصب ولازم يرد الفلوس دلوقتي؟ وبتجيله تهديدات بالقتل لو مردش الفلوس؟ برافو عليك، الاستاذ براد.

لوسي اتوجهتلها تهمة حيازة مخدرات ونصب وتزوير، لكنها مبتروحش المحكمة اصلا وصباح الفل انا تبع مقاطعة تانية وقوانين تانية، وكدة كدة مليش فيه، وعايشة حياتها عادي دلوقتي ملكة بالفلوس، وبراد باشا علي مشارف الحبس ونبذ المجتمع ليه، والحب الحقيقي اللي كنت اقصده هو حب لوسي للفلوس اللي خلاها تخرج بالخطة دي وتنفذها بالاتقان ده علي مدار سنوات، شابوه لوسي

اترك تعليقاً